சிறையில் உள்ள மஹிந்தானந்தவை பார்க்க மதுபானம் கொண்டு வந்த நபர் கைது செய்யப்பட்டார்.

வெலிக்கடை சிறைச்சாலையில் தடுத்து வைக்கப்பட்டுள்ள முன்னாள் அமைச்சர் மஹிந்தானந்த அளுத்கமகேவை பார்க்க மதுபானம் கொண்டு செல்ல முயன்றதாக கூறப்படும் ஒருவருக்கு பிணை வழங்க மாளிகாகந்த நீதவான் நீதிமன்றம் நடவடிக்கை எடுத்துள்ளது. தடைசெய்யப்பட்ட பொருட்களை சிறைச்சாலைக்குள் கொண்டு செல்ல முயன்றபோது சிறைச்சாலை அதிகாரிகளால் கைது செய்யப்பட்ட சந்தேகநபர் இவ்வாறு பிணையில் விடுவிக்கப்பட்டுள்ளார்.

சிறைச்சாலை அதிகாரிகளால் கைது செய்யப்பட்ட பின்னர், இந்த நபர் மேலதிக விசாரணைகளுக்காக பொரளை பொலிஸ் நிலையத்திடம் ஒப்படைக்கப்பட்டார். அதன்பின்னர், பொலிஸார் சந்தேகநபரை நீதிமன்றத்தில் ஆஜர்படுத்தினர், அங்கு விடயங்களை பரிசீலித்த நீதவான், தலா இரண்டு இலட்சம் ரூபா பெறுமதியான இரண்டு சரீரப் பிணைகளில் அவரை விடுவிக்க உத்தரவிட்டார்.

சந்தேகநபர் குளிர்பான போத்தலுக்குள் மதுபானத்தை நிரப்பி, அதை சிறைச்சாலை வளாகத்திற்குள் இரகசியமாக கொண்டு செல்ல திட்டமிட்டிருந்ததாக பொலிஸார் நீதிமன்றத்திற்கு அறிவித்துள்ளனர். இருப்பினும், அந்த நேரத்தில் கடமையில் இருந்த சிறைச்சாலை அதிகாரிகள் மேற்கொண்ட சோதனையின் போது, இந்த தந்திரமான முயற்சி முறியடிக்கப்பட்டு சந்தேகநபர் கைது செய்யப்பட்டுள்ளார்.