நீதிமன்ற உத்தரவின் பேரில் தனது பொறுப்பில் இருந்த சகோதரரின் மகளை பாலியல் துஷ்பிரயோகம் செய்த குற்றச்சாட்டுக்கு ஆளான ஒருவரின் பிணையை ரத்து செய்து, அவரை 14 நாட்கள் விளக்கமறியலில் வைக்க அம்பாறை மேலதிக நீதவான் புஷ்பராஜா ஆனந்தவதனி உத்தரவிட்டுள்ளார். அம்பாறை உஹன பொலிஸ் பிரிவுக்குட்பட்ட வேரங்கெட்டகொட பிரதேசத்தைச் சேர்ந்த சந்தேகநபர், அப்பகுதியில் உள்ள விகாரை ஒன்றின் தஹம் பாடசாலையின் அதிபராகவும் கடமையாற்றியுள்ளமை பொலிஸ் விசாரணைகளில் தெரியவந்துள்ளது.
சில வருடங்களுக்கு முன்னர் நீதிமன்றம் வழங்கிய உத்தரவின்படி, குறித்த சிறுமியின் பொறுப்பை இந்த சந்தேகநபரான மாமா ஏற்றுக்கொண்டிருந்தார். அதன்படி, வீட்டில் வேறு யாரும் இல்லாத சமயங்களில் சந்தேகநபர் அந்த வீட்டில் வசித்த சிறுமியை தொடர்ந்து பாலியல் துஷ்பிரயோகம் செய்துள்ளதாக தெரிவிக்கப்பட்டுள்ளது. இந்த துன்புறுத்தலை தாங்க முடியாத சிறுமி தனது பாடசாலை தோழிகளிடம் இதுபற்றி கூறியதையடுத்து, அவர்களின் ஆலோசனைப்படி தனது சகோதரனுக்கு இந்த சம்பவத்தை தெரிவித்துள்ளார். பின்னர் கிராம மக்களும் இதை அறிந்து தேசிய சிறுவர் பாதுகாப்பு அதிகாரசபைக்கு அறிவித்ததையடுத்து, உஹன பொலிஸார் சந்தேகநபரை கைது செய்துள்ளனர்.
உஹன பொலிஸ் நிலையத்தின் மகளிர் பணியகம் குறித்த குற்றத்தின் தீவிரத்தை சரியாக அடையாளம் காணாமல் நீதிமன்றத்திற்கு 'பி' அறிக்கையை சமர்ப்பித்ததால், அம்பாறை நீதவான் நீதிமன்றம் ஆரம்பத்தில் சந்தேகநபருக்கு பிணை வழங்கியிருந்தது. இருப்பினும், உஹன பொலிஸார் மேற்கொண்ட விசாரணை சரியாக நடைபெறவில்லை என்று கூறி சிறுமியின் தந்தை அம்பாறை மாவட்டத்திற்கு பொறுப்பான சிரேஷ்ட பொலிஸ் அத்தியட்சகர் பிரியந்த பண்டார கஸ்தூரிஆரச்சிக்கு முறைப்பாடு ஒன்றை சமர்ப்பித்தார். அதன்படி, அம்பாறை கோட்ட சிறுவர் மற்றும் மகளிர் பணியகத்தின் நிலையப் பொறுப்பதிகாரி பிரதான பொலிஸ் பரிசோதகர் தயானி கமகேக்கு இந்த சம்பவம் குறித்து மீண்டும் விசாரணை நடத்துமாறு சிரேஷ்ட பொலிஸ் அத்தியட்சகர் உத்தரவிட்டுள்ளார்.
மீண்டும் ஆரம்பிக்கப்பட்ட விரிவான விசாரணையின் போது, குறித்த சிறுமி அம்பாறை பொது மருத்துவமனையின் சட்ட வைத்திய அதிகாரியிடம் அனுப்பி வைக்கப்பட்டார். அங்கு சிறுமி கடுமையான பாலியல் துஷ்பிரயோகத்திற்கு ஆளாகியுள்ளார் என்பது மருத்துவ அறிக்கைகள் மூலம் உறுதிப்படுத்தப்பட்டது. அந்த உண்மைகளின் அடிப்படையில் சந்தேகநபர் மீண்டும் அம்பாறை மேலதிக நீதவானிடம் ஆஜர்படுத்தப்பட்ட பின்னர், முன்னர் வழங்கப்பட்ட பிணையை ரத்து செய்து, அவரை எதிர்வரும் 16 ஆம் திகதி வரை விளக்கமறியலில் வைக்க நீதிமன்றம் உத்தரவிட்டது.
இது தவிர, இந்த சம்பவம் தொடர்பாக ஆரம்பத்தில் செயல்பட்ட உஹன மகளிர் பணியக அதிகாரிகளைப் பற்றியும் ஒரு சிறப்பு விசாரணை தொடங்கப்பட்டுள்ளதுடன், அதன் நிலையப் பொறுப்பதிகாரியை வேறு ஒரு பொலிஸ் நிலையத்திற்கு மாற்றுவதற்கும் நடவடிக்கை எடுக்கப்பட்டுள்ளது. கிழக்கு மாகாணத்திற்கு பொறுப்பான சிரேஷ்ட பிரதிப் பொலிஸ் மாஅதிபர் சட்டத்தரணி வருண ஜெயசுந்தரவின் உத்தரவுகள் மற்றும் அம்பாறை பிரதிப் பொலிஸ் மாஅதிபர் சுஜித் வெதமுல்லவின் மேற்பார்வையின் கீழ் அம்பாறை கோட்டத்திற்கு பொறுப்பான சிரேஷ்ட பொலிஸ் அத்தியட்சகரின் வழிகாட்டுதலின் கீழ் இந்த மேலதிக விசாரணைகள் நடைபெறுகின்றன. அம்பாறை கோட்ட சிறுவர் மற்றும் மகளிர் பணியகத்தின் நிலையப் பொறுப்பதிகாரி உட்பட பொலிஸ் பரிசோதகர் தரங்கா, பொலிஸ் சார்ஜன்ட் (37387) வீரசிங்க மற்றும் பெண் பொலிஸ் கான்ஸ்டபிள்கள் (10237) உஷானி மற்றும் (10686) சச்சினி ஆகிய அதிகாரிகள் விசாரணை நடவடிக்கைகளில் ஈடுபட்டுள்ளனர்.