சுற்றுலா மேம்பாட்டு பணியகத்திற்கு சொந்தமான அரசாங்க நிதியை தவறாகப் பயன்படுத்திய சம்பவம் தொடர்பில் முன்னாள் பொருளாதார அபிவிருத்தி அமைச்சர் பசில் ராஜபக்ஷவை உடனடியாக கைது செய்து நீதிமன்றத்தில் ஆஜர்படுத்துமாறு கொழும்பு கோட்டை நீதவான் பசன் அமரசேன இன்று (17) உத்தரவிட்டார். இந்த உத்தரவு குற்றப் புலனாய்வுத் திணைக்களத்தின் வெளிநாட்டு மற்றும் சட்டவிரோத சொத்துக்கள் விசாரணைப் பிரிவுக்கு வழங்கப்பட்டது.
குறித்த வழக்கு இன்று நீதிமன்றத்தில் மீண்டும் விசாரணைக்கு அழைக்கப்பட்டபோது நீதவான் இந்த நடவடிக்கையை மேற்கொண்டார்.குற்றப் புலனாய்வுத் திணைக்கள அதிகாரிகள் நீதிமன்றத்தில் சமர்ப்பித்த விடயங்களில், கடந்த 2014 ஆம் ஆண்டு சுற்றுலா மேம்பாட்டு நடவடிக்கைகளுக்காக அந்தப் பணியகத்திற்கு ஒதுக்கப்பட்ட 7.8 மில்லியன் (எழுபத்தெட்டு இலட்சம்) ரூபா நிதி சட்டவிரோதமாகப் பயன்படுத்தப்பட்டுள்ளதாகத் தெரிவித்தனர். ஊவா மாகாண சபைத் தேர்தல் காலத்தில் 12,000 டீ-சேர்ட்டுகளை விநியோகிப்பதற்காக இந்த நிதி தவறாகப் பயன்படுத்தப்பட்டு அரசாங்கத்திற்கு பாரிய நிதி இழப்பு ஏற்படுத்தப்பட்டுள்ளதாக விசாரணை அதிகாரிகள் சுட்டிக்காட்டினர். இந்த குற்றச்சாட்டுகள் அனைத்தும் பொதுச் சொத்துச் சட்டத்தின் கீழ் தாக்கல் செய்யப்பட்டுள்ளதாகவும் அவர்கள் நீதிமன்றத்தில் உறுதிப்படுத்தினர்.
வழக்கு விசாரணை நடந்துகொண்டிருந்தபோது, இந்தச் சம்பவத்தின் மூன்றாவது சந்தேகநபர் சார்பில் ஆஜரான ஜனாதிபதி சட்டத்தரணி காலிங்க இந்ததிஸ்ஸ ஒரு விசேட அறிவிப்பை வெளியிட்டார். குற்றவியல் நடைமுறைச் சட்டக்கோவையின் 127வது பிரிவின்படி தனது கட்சிக்காரர் இரகசிய வாக்குமூலம் அளிக்கத் தயாராக இருப்பதாக சட்டத்தரணி அங்கு தெரிவித்தார். இதற்கிடையில், இந்த வழக்கு தொடர்பாக விளக்கமறியலில் வைக்கப்பட்டிருந்த சுற்றுலா மேம்பாட்டு பணியகத்தின் முன்னாள் முகாமைத்துவப் பணிப்பாளர் ரூமி ஜவுஃபரை ஒரு மில்லியன் ரூபா பெறுமதியான இரண்டு சரீரப் பிணைகளில் விடுவிக்க நீதவான் உத்தரவிட்டதுடன், அவர் வெளிநாடு செல்வதைத் தடுக்கும் தடையுத்தரவையும் பிறப்பித்தார்.
மேலும், குறித்த வழக்கின் 'பி அறிக்கையில்' பெயர் குறிப்பிடப்பட்டுள்ள சுற்றுலா மேம்பாட்டு பணியகத்தின் நிதிப் பணிப்பாளரையும் சந்தேகநபராக பெயரிடப்படுவாரா என்பது குறித்து நீதவான் குற்றப் புலனாய்வுத் திணைக்களத்திடம் வினவினார். அதற்கு பதிலளித்த திணைக்களம், அது தொடர்பான சட்டமா அதிபரின் ஆலோசனைகள் இதுவரை தங்களுக்கு கிடைக்கவில்லை என்று குறிப்பிட்டது. சமர்ப்பிக்கப்பட்ட விடயங்களைக் கருத்தில் கொண்ட கொழும்பு கோட்டை நீதவான், இந்த வழக்கின் விசாரணையை அடுத்த ஒக்டோபர் மாதம் 14 ஆம் திகதி மீண்டும் விசாரணைக்கு அழைக்கத் தீர்மானித்தார்.