NDB வங்கியில் இடம்பெற்றதாகக் கூறப்படும் 13 பில்லியன் ரூபா பாரிய நிதி மோசடி தொடர்பான பணம் வெளிநாடுகளுக்கு மாற்றப்பட்டுள்ளதா மற்றும் இதனால் நாட்டின் வெளிநாட்டு நாணய கையிருப்பு கடுமையாகப் பாதிக்கப்பட்டுள்ளதா என்பதை கண்டறிய பொலிஸ் நிதி மோசடி விசாரணைப் பிரிவு (FCID) ஒரு விசேட அறிக்கையை தயாரித்து வருகிறது.
பொதுப் பாதுகாப்பு மற்றும் பாராளுமன்ற விவகார அமைச்சர் ஆனந்த விஜேபால, ‘சண்டே டைம்ஸ் பிசினஸ்’ பத்திரிகைக்குத் தெரிவித்தபடி, பேலியகொட பிரதேசத்தில் முச்சக்கர வண்டி ஒன்றில் இருந்து 30 மில்லியன் ரூபா பணம் கண்டுபிடிக்கப்பட்டதைத் தொடர்ந்து ஆரம்பிக்கப்பட்ட விசாரணைகள் மூலம் இந்த பாரிய மோசடி வலையமைப்பு வெளிச்சத்துக்கு வந்துள்ளது. NDB வங்கியும் உள்ளடங்கலாக 2023 ஆம் ஆண்டுக்கு முன்னரே செயற்பட்டு வந்த ஒரு பரந்த மோசடி வலையமைப்பு பற்றிய தகவல்களை தான் அண்மையில் பாராளுமன்றத்திலும் வெளிப்படுத்தியதாக அமைச்சர் இங்கு நினைவுபடுத்தினார்.
அந்த சந்தர்ப்பத்தில் கிடைத்த தகவல்களின்படி, NDB வங்கிக்குச் சொந்தமான நிதிகளில் ஒரு பகுதி வெளிநாடுகளுக்கும் அனுப்பப்பட்டுள்ளதாக நிதி மோசடி விசாரணைப் பிரிவு தமக்கு அறிவித்திருந்ததாக அமைச்சர் மேலும் குறிப்பிட்டார். இந்த மோசடி செயல்பாடு 2023 ஆம் ஆண்டு முதல் 13 வங்கிகளில் பராமரிக்கப்பட்ட 227 கணக்குகளைப் பயன்படுத்தி, 26,108 போலி தந்திப் பரிமாற்றங்கள் (TT) மூலம் மேற்கொள்ளப்பட்டுள்ளதாக விசாரணைகளில் தெரியவந்துள்ளது.
வெளிநாடுகளில் பராமரிக்கப்படும் போலி கணக்குகளுக்கு தந்திப் பரிமாற்றங்கள் (TT) மூலம் எவ்வளவு பணம் அனுப்பப்பட்டுள்ளது அல்லது இந்த வழியில் ஏதேனும் பணம் வெளிநாடுகளுக்கு அனுப்பப்பட்டுள்ளதா என்பதைத் துல்லியமாக உறுதிப்படுத்த FCID மேலதிக விசாரணைகளை மேற்கொண்டு வருவதாக அமைச்சர் விஜேபால தெரிவித்துள்ளார்.
இதற்கிடையில், இலங்கை மத்திய வங்கியின் நேரடி மேற்பார்வையின் கீழ் டெலாய்ட் டச் டோமாட்சு இந்தியா (Deloitte Touche Tohmatsu India LLP) நிறுவனம் NDB வங்கியில் இடம்பெற்ற 13.2 பில்லியன் ரூபா உள் மோசடி தொடர்பில் ஒரு சுயாதீன தடயவியல் தணிக்கையை நடத்தி வருகிறது. இது இந்த மாத இறுதிக்குள் நிறைவடையும் என வங்கி அதிகாரிகள் தெரிவிக்கின்றனர். கடந்த 10 வருட காலப்பகுதியில் இடம்பெற்ற அனைத்து சந்தேகத்திற்கிடமான பரிவர்த்தனைகளும் இந்த ஆய்வுக்கு உட்படுத்தப்படும் என்றும், அதன் இடைக்கால அறிக்கையின் கண்டுபிடிப்புகள் ஏற்கனவே மத்திய வங்கிக்கு சமர்ப்பிக்கப்பட்டுள்ளதாகவும் அவர்கள் கூறினர்.