நீர்கொழும்பு சிறைச்சாலையில் ஏற்பட்ட கலவரத்தின் போது கைதிகளின் பிடியில் சிக்கி மனிதாபிமானமற்ற சித்திரவதைகளுக்கு ஆளாகியிருந்த சக அதிகாரிகளை காப்பாற்றவும், கைதிகள் பிரதான வாயிலை உடைத்து தப்பிச் செல்வதைத் தடுக்கவும் தீர்க்கமான முறையில் துப்பாக்கிச் சூடு நடத்திய சிறைச்சாலை அதிகாரிக்கு தற்போது தொடர்ச்சியாக மரண அச்சுறுத்தல்கள் விடுக்கப்பட்டு வருவதாகத் தெரிவிக்கப்படுகிறது. இந்த மரண அச்சுறுத்தல்களில் பெரும்பாலானவை டுபாய் உள்ளிட்ட வெளிநாடுகளில் இருந்து தொலைபேசி மூலம் வருவதாக பாதுகாப்புப் பிரிவினர் தெரிவிக்கின்றனர்.
தமது உயிரைப் பணயம் வைத்து, திணைக்களத்தின் நற்பெயரையும், சக ஊழியர்களின் உயிரையும் காப்பாற்றிய இந்த வீர அதிகாரிக்கு உடனடியாக உரிய பாதுகாப்பு வழங்கப்பட வேண்டும் என சிறைச்சாலை ஊழியர்கள் வலியுறுத்துகின்றனர். கொல்லப்பட்ட அதிகாரிகளுக்கு இறுதி அஞ்சலி செலுத்துவதற்காக பொறுப்பு அமைச்சர் ஹர்ஷண நானாயக்கார நேற்று வெலிக்கடை சிறைச்சாலைக்கு விஜயம் செய்தபோது, அங்கு கூடியிருந்த அதிகாரிகள் அமைச்சரை சூழ்ந்துகொண்டு, ஆபத்தில் உள்ள இந்த அதிகாரியின் உயிரைக் காப்பாற்ற உடனடியாக தலையிடுமாறு ஒரே குரலில் கோரிக்கை விடுத்தனர்.
அன்றைய தினம் வெலிக்கடை சிறைச்சாலையில் கைதிகளுக்கும் அதிகாரிகளுக்கும் இடையே ஏற்பட்ட மோதலின் போது, ஒரு குழு கலவரக்காரர்கள் சிறைச்சாலையின் பிரதான வாயிலை மறித்து, பல அதிகாரிகளை பணயக்கைதிகளாக பிடித்து கடுமையாக தாக்கிக் கொண்டிருந்தனர். அந்த நேரத்தில் செயல்பட்ட இந்த அதிகாரி, வாயிலுக்குள் தனது ஆயுதத்தை இலக்கு வைத்து பல துப்பாக்கிச் சூடுகளை நடத்தியதும், பயந்துபோன கைதிகள் வாயிலைக் கைவிட்டு தப்பி ஓடிவிட்டனர். அதன் பின்னர், சிறைச்சாலை அதிகாரிகள் மற்றும் பொலிஸ் விசேட அதிரடிப்படையினர் உடனடியாக வாயில்களைத் திறந்து உள்ளே சென்று, பணயக்கைதிகளாக இருந்த அதிகாரிகளையும், காயமடைந்த கைதிகளையும் காப்பாற்றி உடனடியாக வைத்தியசாலையில் அனுமதிப்பதற்கான நடவடிக்கைகளை எடுத்தனர்.