நீர்கொழும்பு சிறைச்சாலையில் ஏற்பட்ட கடுமையான மோதலில் உயிரிழந்தவர்களில் 73 வயதான உன்னிகிருஷ்ணன் எஸ். (Unnikrishnan S.) என்ற இந்திய பிரஜையும் ஒருவர் என உத்தியோகபூர்வ வட்டாரங்களை மேற்கோள் காட்டி இந்திய 'தி இந்து' பத்திரிகை செய்தி வெளியிட்டுள்ளது.
கடந்த திங்கட்கிழமை இரு எதிரணிக் குழுக்களுக்கிடையில் ஏற்பட்ட கருத்து வேறுபாடு முற்றியதால் ஏற்பட்ட இந்த மோதல்களால் உயிரிழந்தவர்களின் மொத்த எண்ணிக்கை தற்போது 28 ஆக உயர்ந்துள்ளது. படுகாயமடைந்திருந்த மேலும் ஒரு சிறைச்சாலை அதிகாரி உயிரிழந்ததை அடுத்து இந்த மரண எண்ணிக்கை அதிகரித்துள்ளதுடன், இச்சம்பவத்தில் 100க்கும் மேற்பட்டோர் காயமடைந்துள்ளதாக அதிகாரிகள் உறுதிப்படுத்தியுள்ளனர்.இந்த இந்திய பிரஜையின் மரணம் குறித்து கொழும்பில் உள்ள இந்திய உயர்ஸ்தானிகராலயம் இதுவரை உத்தியோகபூர்வ அறிக்கையை வெளியிடவில்லை என்றாலும், கொழும்பில் உள்ள உத்தியோகபூர்வ வட்டாரங்களின்படி, இந்திய தூதுக்குழு இலங்கை வெளிவிவகார அமைச்சுக்கு ஏற்கனவே ஒரு இராஜதந்திர குறிப்பை (Note Verbale) அனுப்பியுள்ளது. இறந்த நபருக்கு எதிராக சுமத்தப்பட்ட குற்றச்சாட்டுகள் மற்றும் எதிர்கால நடவடிக்கைகள் குறித்து விசாரிப்பதற்காக 'தி இந்து' பத்திரிகை இலங்கை சிறைச்சாலைகள் திணைக்களம் மற்றும் இந்திய உயர்ஸ்தானிகராலயத்தை தொடர்பு கொள்ள முயன்ற போதிலும், இதுவரை உரிய பதில் கிடைக்கவில்லை என தெரிவிக்கப்பட்டுள்ளது.
எவ்வாறாயினும், சிறைச்சாலையில் ஏற்பட்ட கலவர நிலைமை கட்டுப்படுத்தப்பட்ட பின்னர், நீர்கொழும்பு சிறைச்சாலையில் தடுத்து வைக்கப்பட்டிருந்த சுமார் 35 இந்திய பிரஜைகள் அவர்களின் பாதுகாப்பிற்காக உடனடியாக நாட்டின் பிற சிறைச்சாலைகளுக்கு மாற்றப்பட்டுள்ளனர். ஞாயிற்றுக்கிழமை தொடங்கி திங்கட்கிழமை வரை கட்டுப்பாடின்றி நீடித்த இந்த மோதல் காரணமாக, நீர்கொழும்பு சிறைச்சாலையில் இருந்த சுமார் 1,200 கைதிகள் பாதுகாப்பு காரணங்களுக்காக தீவு முழுவதும் உள்ள பிற சிறைச்சாலைகளுக்கு மாற்றப்பட அதிகாரிகள் நடவடிக்கை எடுத்தனர்.
