பண்டாரவளையில் உள்ள ஒரு ஸ்பா மையத்தில் இரகசியமாக நடத்தப்பட்ட வீடியோ மோசடி பொலிஸ் சுற்றிவளைப்பில் அம்பலமாகியுள்ளது. பண்டாரவளை, எல்லத்தொட பிரதேசத்தில் இயங்கி வந்த ஒரு ஸ்பா மையத்தை சுற்றிவளைத்த பொலிஸார், வாடிக்கையாளர்களின் பாலியல் நடவடிக்கைகளை இரகசியமாக வீடியோ பதிவு செய்து இணையம் மூலம் விற்பனை செய்யும் மோசடியில் ஈடுபட்ட தம்பதியினர் உட்பட பலரைக் கைது செய்ய நடவடிக்கை எடுத்துள்ளனர்.
இந்த மோசடியை இயக்கிய முக்கிய சந்தேக நபர்களாக வெலிமடை பிரதேசத்தைச் சேர்ந்த 35 வயதுடைய ஒரு நபரும், மினுவாங்கொட பிரதேசத்தைச் சேர்ந்த 40 வயதுடைய ஒரு பெண்ணும் அடையாளம் காணப்பட்டுள்ளனர்.
அந்த இடத்தில் உள்ள அறைகளில் நுட்பமாக பொருத்தப்பட்டிருந்த கமெராக்களின் உதவியுடன் வாடிக்கையாளர்களின் பாலியல் நடவடிக்கைகளை வீடியோ பதிவு செய்த சந்தேக நபர்கள், அந்த காட்சிகளை கையடக்கத் தொலைபேசிகளில் சேமித்து வெளிநாட்டு நிறுவனங்களுக்கு பணத்திற்கு விற்பனை செய்துள்ளமை விசாரணைகளில் உறுதி செய்யப்பட்டுள்ளது.
வாடிக்கையாளர்கள் தேர்ந்தெடுக்கும் பெண்ணைப் பொறுத்து 4000 முதல் 8000 ரூபாய் வரை கட்டணம் வசூலித்து இந்த விபச்சார மற்றும் வீடியோ மோசடி நடத்தப்பட்டுள்ளது.
சுற்றிவளைப்பின் போது சந்தேகத்திற்குரிய தம்பதியினரைத் தவிர, ஜா-எல, மினுவாங்கொட, மாத்தளை மற்றும் வெலிமடை பிரதேசங்களைச் சேர்ந்த 18 முதல் 40 வயதுக்குட்பட்ட நான்கு பெண்களும், மேலும் ஒரு நபரும் பொலிஸ் காவலில் எடுக்கப்பட்டுள்ளனர். கைது செய்யப்பட்ட சந்தேக நபர்கள் பாலியல் நோய்கள் தொடர்பான மருத்துவ பரிசோதனைக்கு உட்படுத்தப்பட்டுள்ளனர், மேலும் அவர்களிடமிருந்த கையடக்கத் தொலைபேசிகள் மேலதிக விசாரணைகளுக்காக கணினி குற்றப் புலனாய்வுப் பிரிவிடம் ஒப்படைக்கப்படவுள்ளன.
பண்டாரவளைப் பிரிவின் விசேட புலனாய்வுப் பிரிவின் பொறுப்பதிகாரி பிரதான பொலிஸ் பரிசோதகர் நிஷாந்த குணதிலக்க உள்ளிட்ட பொலிஸ் குழுவினர், உதவிப் பொலிஸ் அத்தியட்சகர் ரூவன் பெர்னாண்டோ, சிரேஷ்ட பொலிஸ் அத்தியட்சகர் மயூரா பெரேரா, பிரதிப் பொலிஸ் மா அதிபர் லக்ஷிரி விஜயரத்ன மற்றும் ஊவா மாகாண சிரேஷ்ட பிரதிப் பொலிஸ் மா அதிபர் மகேஷ் சேனாரத்ன ஆகியோரின் அறிவுறுத்தலின் பேரில் இந்த சுற்றிவளைப்பை மேற்கொண்டுள்ளனர்.
அந்த சுற்றிவளைப்பை வெற்றிகரமாக மேற்கொள்வதற்காக, அந்த இடத்தில் சேவைகளைப் பெறும் ஒருவராக மாறுவேடமிட்ட ஒரு உளவு முகவரின் உதவியை பொலிஸார் பெற்றுள்ளனர்.