இரண்டு தனியார் நிறுவனங்களுக்கு இடையிலான காசோலை பரிவர்த்தனை தொடர்பில், சிலோன் நியூஸ் பேப்பர்ஸ் நிறுவனத்தின் முகாமைத்துவ பணிப்பாளரும் முன்னாள் அமைச்சருமான டிராண் அலஸ் அவர்களை கைது செய்வதைத் தடுக்கும் இடைக்கால உத்தரவு கோரி தாக்கல் செய்யப்பட்ட ரிட் மனுவை எதிர்வரும் 30ஆம் திகதி விசாரணைக்கு எடுக்க மேன்முறையீட்டு நீதிமன்றம் திகதி நிர்ணயித்தது. மகேந்திர மற்றும் பிரதீப் ஹெட்டியாராச்சி ஆகியோரைக் கொண்ட மேன்முறையீட்டு நீதிமன்ற நீதிபதிகள் குழாம் முன்னிலையில் இந்த மனு பரிசீலிக்கப்பட்டது.
சிலோன் நியூஸ் பேப்பர்ஸ் தனியார் நிறுவனம் மற்றும் 'கேசர லங்கா' தனியார் நிறுவனம் ஆகியவற்றுக்கு இடையில் இடம்பெற்ற காசோலை பரிவர்த்தனை தொடர்பில் கிடைக்கப்பெற்ற முறைப்பாட்டின் அடிப்படையில், முன்னாள் அமைச்சர் எந்த நேரத்திலும் கைது செய்யப்பட வாய்ப்புள்ளதாக மனுவில் குறிப்பிடப்பட்டுள்ளது. சட்டத்தரணி சனத் விஜேவர்தன ஊடாக தாக்கல் செய்யப்பட்ட இந்த மனுவில், பொலிஸ் மா அதிபர், குற்றப் புலனாய்வுத் திணைக்களத்தின் பணிப்பாளர் மற்றும் கேசர லங்கா நிறுவனம் உள்ளிட்டோர் பிரதிவாதிகளாக பெயரிடப்பட்டுள்ளனர்.
இந்த நெருக்கடி தொடர்பாக பொலிஸார் ஏற்கனவே மனுதாரர் நிறுவனத்தின் பல ஊழியர்களிடம் விசாரணை நடத்தியுள்ளதாக நீதிமன்றத்திற்கு அறிவிக்கப்பட்டுள்ளது. இவ்வாறானதொரு பின்னணியில், நிறுவனத்தின் முகாமைத்துவ பணிப்பாளரைக் கைது செய்வது சட்டவிரோதமானது என்பதால், அதைத் தடுக்கும் ரிட் உத்தரவு மற்றும் இடைக்கால உத்தரவு பிறப்பிக்குமாறு மனுதாரர் நிறுவனம் கோருகிறது. இங்கு மனுதாரர்கள் சார்பில் ஜனாதிபதி சட்டத்தரணி ரொமேஷ் டி சில்வா ஆஜரானார், பிரதிவாதிகள் சார்பில் ஜனாதிபதி சட்டத்தரணி விராத் கொரயா வாதங்களை முன்வைத்தார்.