மலேசியாவின் சிலாங்கூர் மாநிலம் ஜெஞ்சரோமில் கட்டாய உழைப்பு சுரண்டல் கடத்தல் கும்பலுடன் தொடர்புடையதாக சந்தேகிக்கப்படும் 38 வயதுடைய இலங்கையர் ஒருவர் அந்நாட்டு குடிவரவுத் திணைக்களத்தால் கைது செய்யப்பட்டுள்ளார். அங்கு இரக்கமின்றி சுரண்டப்பட்ட இலங்கை பெண் ஒருவரையும் அதிகாரிகள் மீட்டுள்ளனர்.
கிடைத்த பொதுமக்களின் முறைப்பாடுகள் மற்றும் இரகசிய புலனாய்வுத் தகவல்களின் அடிப்படையில், மனிதக் கடத்தல் மற்றும் சட்டவிரோத குடியேற்றக்காரர்களைக் கடத்துவதற்கு எதிரான மற்றும் பணச் சலவை தடுப்புப் பிரிவு இந்த விசேட நடவடிக்கையை மேற்கொண்டுள்ளது.
மலேசியப் பெண்ணை மணந்து நீண்டகால வதிவிட விசாவைப் பெற்றுள்ள சந்தேகநபர், சட்டபூர்வமான வேலை மற்றும் பணி விசாவை வழங்குவதாகக் கூறி இந்த பெண்ணை நாட்டிற்கு அழைத்து வந்துள்ளார். பின்னர், சந்தேகநபருக்குச் சொந்தமான உணவு வணிகத்தில் எந்த ஊதியமும் வழங்கப்படாமல் அவர் வேலைக்கு அமர்த்தப்பட்டுள்ளார். போதுமான உணவு வழங்கப்படாமலும், போக்குவரத்து உரிமைகள் மறுக்கப்பட்டும், உடல் ரீதியான துன்புறுத்தல்கள் மற்றும் அச்சுறுத்தல்கள் விடுக்கப்பட்டதும் ஆரம்பகட்ட விசாரணைகளில் உறுதி செய்யப்பட்டுள்ளது.
அந்நாட்டின் தேசிய வழிகாட்டுதல்களின்படி, பாதிக்கப்பட்ட பெண் சுரண்டப்பட்ட ஒருவராக அடையாளம் காணப்பட்டு அதிகாரிகளால் பொறுப்பேற்கப்பட்டுள்ளார். இந்த நடவடிக்கையின் போது, செல்லுபடியான பயண ஆவணங்கள் இல்லாமல் சட்டவிரோதமாக தங்கியிருந்த 21 முதல் 51 வயதுக்குட்பட்ட மேலும் ஆறு இலங்கையர்கள் (நான்கு ஆண்கள் மற்றும் இரண்டு பெண்கள்) கைது செய்யப்பட்டுள்ளனர்.
சந்தேகநபரான இலங்கையருக்கு எதிராக 2007 ஆம் ஆண்டின் மனிதக் கடத்தல் மற்றும் சட்டவிரோத குடியேற்றக்காரர்களைக் கடத்துவதற்கு எதிரான சட்டம் மற்றும் குடிவரவுச் சட்டத்தின் கீழ் சட்ட நடவடிக்கை எடுக்கப்பட்டுள்ளது. கட்டாய உழைப்பு மற்றும் மனிதக் கடத்தலுடன் தொடர்புடையவர்களுக்கு எதிராக எந்தவித பாகுபாடும் இன்றி சட்டம் கடுமையாக அமுல்படுத்தப்படும் என்று மலேசிய குடிவரவுத் திணைக்களம் மேலும் தெரிவித்துள்ளது.
