தங்கல்ல - மாத்தறை பிரதான வீதியில் வெல்லமடம பிரதேசத்தில் நேற்று (19) மாலை இடம்பெற்ற கோர விபத்தில் மேலும் ஒருவர் உயிரிழந்ததையடுத்து, அந்த விபத்தில் உயிரிழந்தவர்களின் எண்ணிக்கை இரண்டாக அதிகரித்துள்ளது. இந்த துரதிர்ஷ்டவசமான சம்பவம் மாலை 3.50 மணியளவில் மாத்தறை திசையிலிருந்து தங்கல்ல திசை நோக்கிச் சென்ற டிஃபென்டர் ஜீப் வண்டிக்கும், தங்கல்ல திசையிலிருந்து மாத்தறை திசை நோக்கி சிமெண்ட் ஏற்றி வந்த லொரி வண்டிக்கும் இடையே நேருக்கு நேர் மோதியதாலேயே இடம்பெற்றுள்ளது.
விபத்து இடம்பெற்ற வேளையில் டிஃபென்டர் வண்டியில் ஐவர் பயணித்துள்ளனர். லொரி வண்டியில் சாரதி மற்றும் உதவியாளர் உட்பட இருவர் இருந்துள்ளனர். ஏற்பட்ட பலத்த மோதலில் இரண்டு வண்டிகளிலும் பயணித்த ஏழு பேரும் காயமடைந்து வைத்தியசாலையில் அனுமதிக்கப்பட்ட நிலையில், அவர்களில் இருவர் தற்போது உயிரிழந்துள்ளனர்.
இவ்வாறு துரதிர்ஷ்டவசமாக உயிரிழந்தவர்கள், டிஃபென்டர் வண்டியை ஓட்டிச் சென்ற மாத்தறை, வெவஹமந்துவ பிரதேசத்தைச் சேர்ந்த 37 வயதுடைய வெதமுல்ல கங்கானம்கே தினேஷ் உதயங்க என்பவரும், அதே வண்டியில் பயணித்த மாத்தறை, ஹித்டெட்டிய மெத பிரதேசத்தைச் சேர்ந்த 36 வயதுடைய எஸ்.எம்.வி. சுபாஷ் என்பவருமாவர்.
சம்பவத்தில் காயமடைந்தவர்களில் மேலும் இருவரின் நிலைமை கவலைக்கிடமாக உள்ளதாக வைத்தியசாலை வட்டாரங்கள் உறுதிப்படுத்தியுள்ளன. பொலிஸார் மேற்கொண்ட ஆரம்பகட்ட விசாரணைகளில், விபத்துக்குள்ளான டிஃபென்டர் வண்டியை இந்த இளைஞர்கள் குழு ஒரு நாளுக்காக வாடகைக்கு எடுத்திருந்தது தெரியவந்துள்ளது.
விபத்தில் டிஃபென்டர் வண்டிக்கும், லொரி வண்டிக்கும் பலத்த சேதம் ஏற்பட்டுள்ளதுடன், சம்பவம் தொடர்பான மேலதிக விசாரணைகளை மாத்தறை பொலிஸ் நிலைய அதிகாரிகள் மேற்கொண்டு வருகின்றனர்.
