போலி ஆடம்பர ஃபேஷன் பொருட்களை இரகசியமாக விற்ற 29 வயதான சமூக ஊடக செல்வாக்கு செலுத்துபவர் ஒருவருக்கு (social media influencer) ஃபெண்டி (Fendi), லூயிஸ் வீடன் (Louis Vuitton) மற்றும் கிறிஸ்டியன் டியோர் (Christian Dior) ஆகிய உலகின் முன்னணி ஃபேஷன் பிராண்டுகளுக்கு 213,000 பவுண்டுகள் இழப்பீடு செலுத்துமாறு உயர் நீதிமன்றம் உத்தரவிட்டுள்ளது.
எசெக்ஸ் (Essex) இல் அமைந்துள்ள 'ஸ்லோன் ஹவுஸ் மார்க்கெட்டிங்' (Sloane House Marketing) என்ற டிஜிட்டல் மார்க்கெட்டிங் நிறுவனத்தின் நிறுவனர் ஜோர்ஜியா ஆல்ட்ரிட்ஜ் (Georgia Aldridge) என்பவர், இன்ஸ்டாகிராம் (Instagram) மூலம் 32,000 க்கும் மேற்பட்ட பின்தொடர்பவர்களைக் கொண்டவர். பிராண்டுகளுக்கு தனது சமூக ஊடக இடுகைகள் மூலம் அதிக லாபம் ஈட்டுவதாகக் கூறி அவர் தனது வணிகத்தை நடத்தி வந்தாலும், அதே நேரத்தில், சீன ஆன்லைன் சந்தையான AliExpress மூலம் பெறப்பட்ட போலி ஃபேஷன் பொருட்களை விற்பனை செய்ய அவர் சிறப்பு WhatsApp குழுக்களைப் பயன்படுத்தியுள்ளார் என்பது தெரியவந்துள்ளது.
அவரது 'ரோலோ ஃபேஷன் லிமிடெட்' (Rolo Fashion Ltd) என்ற நிறுவனம் மூலம் செய்யப்பட்ட வர்த்தக முத்திரை மீறல்கள் தொடர்பாக உலகின் புகழ்பெற்ற ஃபேஷன் பிராண்டுகள் இவ்வாறு வழக்குத் தொடுத்திருந்தன. அவர் விற்ற சில போலிப் பொருட்கள் அசல் தயாரிப்புகளைப் போலவே நுட்பமாக வடிவமைக்கப்பட்டிருந்ததால் அவை 'சூப்பர்ஃபேக்குகள்' (superfakes) என்று அழைக்கப்பட்டன என்றும், இதன் மூலம் நுகர்வோர் ஏமாற்றப்பட்டு அசல் பிராண்டுகளின் விற்பனை கடுமையாகப் பாதிக்கப்பட்டது என்றும் நீதிமன்றத்தில் மேலும் தெரியவந்தது.
இந்த வழக்கை விசாரித்த நீதிபதி ரிச்சர்ட் ஹேகன் (Richard Hacon) கூறியது என்னவென்றால், குமாரி ஆல்ட்ரிட்ஜின் இந்தச் செயல்களால் சம்பந்தப்பட்ட நிறுவனங்களுக்கு சுமார் 713 அசல் தயாரிப்புகளை விற்பனை செய்யும் வாய்ப்புகள் இழக்கப்பட்டுள்ளன என்றும், 4,000 க்கும் மேற்பட்ட பரிவர்த்தனைகளில் இருந்து பெறப்பட வேண்டிய உரிம வருவாய் இழக்கப்பட்டுள்ளது என்றும் கூறினார். பிராண்டுகளின் நற்பெயருக்கு ஏற்பட்ட சேதம் குறித்த சம்பந்தப்பட்ட நிறுவனங்களின் குற்றச்சாட்டை நீதிபதி நிராகரித்தாலும், இழந்த லாபம் மற்றும் உரிம வருவாயைக் கருத்தில் கொண்டு 213,000 பவுண்டுகள் இழப்பீடு செலுத்த அவர் உத்தரவிட்டார்.
