கொத்தலாவல பாதுகாப்புப் பல்கலைக்கழகத்தின் களப்பயணத்தின் போது ஏற்பட்ட பேருந்து விபத்தில் தனது மகன் உட்பட மூன்று மாணவர்கள் உயிரிழந்த சம்பவத்திற்கு நஷ்டஈடு கோரி தந்தையொருவர் தாக்கல் செய்த அடிப்படை உரிமை மனுவை விசாரணைக்கு எடுத்துக்கொள்வதற்காக உயர் நீதிமன்றம் எதிர்வரும் செப்டம்பர் மாதம் 11ஆம் திகதி திகதியிட்டுள்ளது. குறித்த மனு நேற்று (15) அழைக்கப்பட்டபோது நீதிமன்றம் இந்தத் தீர்மானத்தை எடுத்தது.
அர்ஜுன ஒபேசேகர, கலாநிதி சோபித ராஜகருணா மற்றும் மேனகா விஜேசுந்தர ஆகியோரை உள்ளடக்கிய மூவரடங்கிய உயர் நீதிமன்ற நீதிபதிகள் குழாம் முன்னிலையில் இந்த மனு பரிசீலிக்கப்பட்டது. அப்போது முன்வைக்கப்பட்ட விடயங்களை பரிசீலித்த நீதிபதிகள் குழாம், அன்றைய தினத்தில் ஏதேனும் ஆட்சேபனைகள் இருந்தால் அவற்றை தாக்கல் செய்யுமாறு சம்பந்தப்பட்ட பேருந்தின் சாரதிக்கு உத்தரவிட்டது.
ரம்புக்கனை பிரதேசத்தைச் சேர்ந்த பிரசாத நுவன் என்ற தந்தை ஒருவரால் இந்த மனு நீதிமன்றத்தில் தாக்கல் செய்யப்பட்டது. கொத்தலாவல பாதுகாப்புப் பல்கலைக்கழகத்தில் அளவு ஆய்வுப் பட்டப்படிப்பை மேற்கொண்டு வந்த தனது மகன் லோஹித மினுர வாஹலவத்த உட்பட பல மாணவர்கள் கடந்த 2024ஆம் ஆண்டு நவம்பர் மாதம் பதுளை பிரதேசத்தில் களப்பயணத்தில் ஈடுபட்டிருந்தபோது இந்த விபத்தை எதிர்கொண்டனர். அப்போது அம்பகஹஹந்திய பிரதேசத்தில் அவர்கள் பயணித்த பேருந்து விபத்துக்குள்ளானதில் தனது மகன் உட்பட மூன்று மாணவர்கள் உயிரிழந்ததாக மனுதாரர் சுட்டிக்காட்டுகிறார்.
எதிர்மனுதாரர்களின் கடுமையான கவனக்குறைவு காரணமாக இந்த மரண விபத்து ஏற்பட்டதாகவும், அதன் மூலம் தனது அடிப்படை உரிமைகள் மீறப்பட்டுள்ளதாகவும் தந்தை தனது மனுவில் குற்றம் சாட்டுகிறார். இதன் காரணமாக இந்த மனுவை விசாரணைக்கு எடுத்துக்கொள்ள அனுமதிக்குமாறும், அதன் பின்னர் ஏற்பட்ட அநீதிக்கு நியாயமான நஷ்டஈடு வழங்குமாறும் அவர் நீதிமன்றத்திடம் கோருகிறார். இதில் எதிர்மனுதாரர்களாக கொத்தலாவல பாதுகாப்புப் பல்கலைக்கழகத்தின் உபவேந்தர், அதன் நிரந்தர சபை மற்றும் விபத்துக்குள்ளான பேருந்தின் சாரதி ஆகியோர் பெயரிடப்பட்டுள்ளனர்.
மனு அழைக்கப்பட்டபோது, மனுதாரரான தந்தை சார்பில் சட்டத்தரணி சஜுனி செனவிரத்னவின் அறிவுறுத்தலின் பேரில் ஜனாதிபதி சட்டத்தரணி சந்தக ஜயசுந்தர ஆஜரானார், அத்துடன் சட்டமா அதிபர் சார்பில் பிரதி சொலிசிட்டர் ஜெனரல் ராஜீவ் குணதிலக்க நீதிமன்றத்தில் ஆஜரானார்.