உக்ரைன் ஜனாதிபதி வோலோடிமிர் செலென்ஸ்கியின் சொந்த நகரமான கிரிவி ரிஹ் (Kryvyi Rih) நகரில் உள்ள மக்கள் நடமாட்டம் மிகுந்த வர்த்தக வளாகம் ஒன்றின் மீது ரஷ்யப் படைகள் நடத்திய இரட்டை ட்ரோன் தாக்குதலில் குறைந்தது 16 பொதுமக்கள் உயிரிழந்ததுடன், 130க்கும் மேற்பட்டோர் காயமடைந்துள்ளனர். 2026 ஆகஸ்ட் 21 வெள்ளிக்கிழமை மாலை நடந்த இந்த துயர சம்பவத்திற்குப் பிறகு, இடிபாடுகளுக்குள் சிக்கியவர்களை மீட்கும் தீவிர நடவடிக்கைகள் சனிக்கிழமை முழுவதும் தொடர்ந்தன.
ட்னிப்ரோபெட்ரோவ்ஸ்க் பிராந்தியத்தில் அமைந்துள்ள மிகப்பெரிய பொழுதுபோக்கு மற்றும் வர்த்தக மையங்களில் ஒன்றான 'சோனியாச்னா ஹலேரேயா' (Soniachna Halereia) வளாகத்தை இலக்காகக் கொண்டு இந்தத் தாக்குதல் நடத்தப்பட்டபோது, அங்கு ஏராளமான பொதுமக்கள் கூடியிருந்தனர்.உள்ளூர் நேரப்படி மாலை 4:30 மணியளவில் நடத்தப்பட்ட முதல் ட்ரோன் தாக்குதலில் வர்த்தக வளாகத்திற்குள் பெரும் தீ விபத்து ஏற்பட்டதுடன், அது வேகமாகப் பரவியது. சுமார் 30 நிமிடங்களுக்குப் பிறகு, பொலிஸ், மருத்துவக் குழுக்கள் மற்றும் தீயணைப்பு வீரர்கள் மக்களை வெளியேற்றி முதலுதவி அளித்துக் கொண்டிருந்தபோது, மிகத் தாழ்வாகப் பறந்த ஜெட் எஞ்சின் பொருத்தப்பட்ட 'ஷாஹெட்' (Shahed) ரக இரண்டாவது ட்ரோன் விமானம் அதே இடத்தில் விழுந்து வெடித்தது. நிவாரணப் பணியாளர்களை இலக்காகக் கொண்டு மேற்கொள்ளப்பட்ட இந்த 'டபுள் டேப்' (Double-tap) தந்திரம் சர்வதேச மனிதாபிமான சட்டங்களை கடுமையாக மீறுவதாகும் என்று உக்ரைன் அதிகாரிகள் சுட்டிக்காட்டுகின்றனர்.
இடிபாடுகளுக்குள் இருந்து சடலங்கள் கண்டெடுக்கப்பட்டதால் உயிரிழந்தவர்களின் எண்ணிக்கை அதிகரித்ததுடன், காயமடைந்தவர்களில் 23 சிறுவர்களும் அடங்குவர். காயமடைந்தவர்களில் 29 பேரின் நிலைமை கவலைக்கிடமாக உள்ளதுடன், தலையில் பலத்த காயமடைந்த 14 வயது சிறுமி உட்பட ஐந்து சிறுவர்களும் இதில் அடங்குவர். மேலும், ட்னிப்ரோபெட்ரோவ்ஸ்க் பிராந்திய இராணுவ நிர்வாகத்தின் தலைவர் ஒலெக்சாண்டர் ஹன்ஷா, இரண்டு சிறுவர்கள் உட்பட ஒன்பது பேர் குறித்து இதுவரை எந்த தகவலும் இல்லை என்று தெரிவித்தார்.
வெள்ளிக்கிழமை இரவு 11 மணியளவில் தீ அணைக்கப்பட்டதுடன், உள்ளூர் நிவாரணக் குழுக்களுக்கு ஆதரவளிக்க கார்கிவ், சப்போரிஜியா, கிர்கோவ், போல்டாவா மற்றும் டொனெட்ஸ்க் ஆகிய பிராந்தியங்களில் இருந்து சிறப்பு மீட்புக் குழுக்கள் வரவழைக்கப்பட்டன. பொலிஸ், தீயணைப்பு வீரர்கள் மற்றும் உளவியலாளர்கள் அடங்கிய குழுவினர் சனிக்கிழமை முழுவதும் மீட்புப் பணிகளில் ஈடுபட்டனர். இடிபாடுகளை அகற்றும் போது உயிரிழந்தவர்கள் மற்றும் காயமடைந்தவர்களின் எண்ணிக்கை மேலும் அதிகரிக்கலாம் என்று அதிகாரிகள் எச்சரித்துள்ளனர்.
இந்தத் தாக்குதலை "மிகவும் இழிவான மற்றும் காட்டுமிராண்டித்தனமான செயல்" என்று உக்ரைன் ஜனாதிபதி வோலோடிமிர் செலென்ஸ்கி கடுமையாகக் கண்டித்ததுடன், இது நிவாரணப் பணியாளர்களை இலக்காகக் கொண்ட நேரடி பயங்கரவாதத் தாக்குதல் என்றும் உக்ரைன் அதற்கு உரிய பதிலடி கொடுக்கும் என்றும் தெரிவித்தார். பிராந்திய பாதுகாப்பு சபையின் தலைவர் ஒலெக்சாண்டர் வில்குல் தாக்குதல்தாரிகளை மனிதாபிமானமற்றவர்கள் என்று அழைத்ததுடன், மனித உரிமைகள் ஆணையாளர் டிமிட்ரோ லுபினெட்ஸ், பகல் நேரத்தில் பொதுமக்கள் கூடும் இடங்களை இலக்கு வைப்பது ஒரு இழிவான குற்றம் என்று சுட்டிக்காட்டினார். ஐரோப்பிய ஒன்றியத்தின் வெளிநாட்டுக் கொள்கைத் தலைவர் காஜா கல்லாஸ் இதை ஒரு திட்டமிட்ட பயங்கரவாதம் என்று வர்ணித்து, ரஷ்யாவுக்கு எதிராக கடுமையான தடைகளை விதிக்க நடவடிக்கை எடுப்பதாக அறிவித்தார்.
போரின் முன்வரிசைப் போர் மண்டலத்திலிருந்து 40-60 கிலோமீட்டர் தொலைவில் அமைந்துள்ள கிரிவி ரிஹ் நகரம் அடிக்கடி ரஷ்ய தாக்குதல்களுக்கு உள்ளாகிறது. இந்தச் சம்பவம், தலைநகர் கீவ் மீது நடத்தப்பட்ட தாக்குதலில் 16 பேர் உயிரிழந்த ஒரு நாளுக்குப் பிறகு பதிவாகியுள்ளது. இந்த வர்த்தக வளாகத் தாக்குதல் குறித்து ரஷ்ய பாதுகாப்பு அமைச்சகம் எந்த நேரடி அறிக்கையையும் வெளியிடவில்லை. உக்ரைனும் இதற்கு பதிலடியாக ரஷ்ய இராணுவ மற்றும் எரிசக்தி மையங்கள் மீது நீண்ட தூர ட்ரோன் தாக்குதல்களைத் தொடர்ந்து நடத்தி வருகிறது.
