தெற்கு அதிவேக நெடுஞ்சாலையில் கலணிகம மற்றும் தொடங்கொட பரிமாற்றங்களுக்கு இடையில் உள்ள பகுதியில் இரண்டு பேருந்துகள், ஒரு கார் மற்றும் 6 மோட்டார் வாகனங்கள் உட்பட சுமார் 11 வாகனங்கள் ஒன்றுடன் ஒன்று மோதியதால் ஒரு பாரிய விபத்து இடம்பெற்றுள்ளது. மாத்தறையிலிருந்து கொழும்பு நோக்கிச் சென்ற இந்த வாகனங்கள் விபத்துக்குள்ளானதால் பாடசாலை மாணவர்கள் உட்பட 10க்கும் மேற்பட்டோர் காயமடைந்து சிகிச்சைக்காக அருகிலுள்ள வைத்தியசாலைகளில் அனுமதிக்கப்பட்டுள்ளனர்.
பாடசாலை மாணவர்களை ஏற்றிச் சென்ற பேருந்து ஒன்று கார் ஒன்றில் மோதியதையடுத்து பின்னால் வந்த மேலும் பல வாகனங்கள் ஒன்றுடன் ஒன்று மோதியதால் இந்த விபத்து இடம்பெற்றுள்ளதாக தெரிவிக்கப்படுகிறது. இவ்வாறாக அதிக எண்ணிக்கையிலான வாகனங்கள் விபத்துக்குள்ளானதால் கொழும்பு நோக்கிய பாதையில் போக்குவரத்து முற்றிலும் தடைப்பட்டுள்ளதுடன், கலணிகம மற்றும் தொடங்கொட இடையே கடும் வாகன நெரிசலும் ஏற்பட்டுள்ளது.
பாதை தடைப்பட்டதையடுத்து காலி திசையிலிருந்து கொழும்பு நோக்கிச் செல்லும் வாகனங்கள் தொடங்கொட வெளியேறும் வாயில் வழியாக திருப்பி விட பொலிஸார் நடவடிக்கை எடுத்துள்ளனர். சம்பவம் தொடர்பில் அதிவேக நெடுஞ்சாலைப் பொலிஸார் மேலதிக விசாரணைகளை மேற்கொண்டு வருகின்றனர்.
