மொரட்டுவ, அகுலான கடற்கரைக்கு அருகில் கடலில் விபத்துக்குள்ளான இலங்கை கடற்படைக்குச் சொந்தமான P-4447 டோரா தாக்குதல் படகில் காணாமல் போயிருந்த இரண்டாவது கட்டளை அதிகாரியின் உடல் 20 நாட்களுக்குப் பிறகு கண்டுபிடிக்கப்பட்டதைத் தொடர்ந்து, நேற்று (செப்டம்பர் 05) இரவு பொரலஸ்கமுவ, வேரஹரவில் உள்ள அவரது வீட்டிற்கு கொண்டுவரப்பட்டது.
இவ்வாறு துரதிர்ஷ்டவசமாக உயிரிழந்தவர் வேரஹர பிரதேசத்தைச் சேர்ந்த 26 வயது லெப்டினன்ட் உதயப்பிரியா ஆவார். தற்போது குடும்ப உறவினர்கள், நண்பர்கள் மற்றும் பல கடற்படை அதிகாரிகள் அவரது வீட்டிற்கு வந்து உடலுக்கு இறுதி அஞ்சலி செலுத்தி வருகின்றனர்.
கடந்த ஆகஸ்ட் மாதம் 15 ஆம் திகதி, பன்னிரண்டு கடற்படையினர் கொண்ட குழுவினர் தமது ரோந்துப் பணியை முடித்துக்கொண்டு மீண்டும் கொழும்பு நோக்கி வந்துகொண்டிருந்தபோது, அகுலான கடற்கரையிலிருந்து சுமார் 3 கிலோமீட்டர் தொலைவில் கடலில் இந்த விபத்து ஏற்பட்டது. சம்பவம் தெரியவந்ததும் உடனடியாகச் செயற்பட்ட அகுலான பொலிஸார், கடற்படை மற்றும் விமானப்படை இணைந்து ஒரு கூட்டு மீட்பு நடவடிக்கையை ஆரம்பித்தனர். பாதுகாப்பு உடைகளை அணிந்து நீரில் மிதந்துகொண்டிருந்த 11 கடற்படையினர் பாதுகாப்பாக மீட்கப்பட்டு மருத்துவமனையில் அனுமதிக்கப்பட்டனர். அந்த கண்காணிப்பு மற்றும் மீட்பு நடவடிக்கைகளுக்காக விமானப்படையின் MI 17 மற்றும் பெல் 412 ரக ஹெலிகொப்டர்களும் பயன்படுத்தப்பட்டன.
விபத்துக்குள்ளான படகை கொழும்பு துறைமுகத்திற்கு இழுத்து வர கடற்படை முயற்சித்த போதிலும், வெள்ளவத்தை பிரதேசத்திற்கு அருகில் அதன் வெற்றிட அமைப்பு செயலிழந்ததால் படகு சுமார் 75 அடி ஆழம் கடலுக்குள் மூழ்கியதாக பொலிஸார் தெரிவித்தனர். பின்னர் கடற்படை நீச்சல் வீரர்கள் கடலுக்குள் மூழ்கியிருந்த படகின் உள்ளே மேற்கொண்ட விசேட தேடுதல் நடவடிக்கையின் போது காணாமல் போயிருந்த லெப்டினன்ட்டின் உடலைக் கண்டுபிடிக்க முடிந்தது என துறைமுக பொலிஸார் மேலும் உறுதிப்படுத்தினர்.