தலவத்துகொட பிரதேசத்தில் அமைந்துள்ள வெளிநாட்டு விமான டிக்கெட் மற்றும் விசா வழங்கும் நிறுவனத்தில் இடம்பெற்ற கொள்ளைச் சம்பவம் தொடர்பில் சந்தேகத்தின் பேரில் தந்தையும் மகளும் மேல் மாகாண தென் குற்றப் பிரிவினரால் கைது செய்யப்பட்டுள்ளனர். இவ்வாறு கைது செய்யப்பட்டவர்கள் கடுவெல பிரதேசத்தைச் சேர்ந்த 47 வயதுடைய தனியார் பாதுகாப்பு உத்தியோகத்தர் ஒருவரும், பஹல போமிரிய யாகால பிரதேசத்தைச் சேர்ந்த 25 வயதுடைய ஆடைத் தொழிற்சாலை ஊழியர் ஒருவருமாவர்.
கடந்த முதலாம் திகதி மாலை தலங்கம பன்னிப்பிட்டிய வீதியில் அமைந்துள்ள குறித்த நிறுவனத்திற்குள் மன்னா கத்திகளைக் காட்டி நுழைந்த ஆயுததாரிகள், அங்கிருந்த ஆறு கோடியே நாற்பத்தொன்பது இலட்சத்து தொண்ணூற்றைந்தாயிரம் ரூபாவை கொள்ளையிட்டுள்ளனர். அத்துடன், அந்த நிறுவனத்தின் உரிமையாளர் அணிந்திருந்த இருபத்தொன்பது அரை பவுண் எடையுள்ள ஒரு கோடியே பன்னிரண்டு இலட்சத்து ஐம்பதாயிரம் ரூபா பெறுமதியான தங்கச் சங்கிலி ஒன்றையும், மூன்று தங்க மோதிரங்களையும் கொள்ளையர்கள் எடுத்துச் சென்றுள்ளனர்.
இந்த கொள்ளைச் சம்பவத்துடன் தொடர்புடைய பிரதான சந்தேகநபரான இளைஞர் ஒருவர் கெக்கிராவ பிரதேசத்தில் தங்கியிருப்பதாக கிடைத்த தகவலின் அடிப்படையில் விசாரணைகள் மேற்கொள்ளப்பட்டபோது, அவர் கடந்த 9ஆம் திகதி ஐஸ் போதைப்பொருளுடன் ஹபரண பொலிஸாரால் கைது செய்யப்பட்டுள்ளார் என்பது தெரியவந்துள்ளது. போதைப்பொருளுக்கு அடிமையான குறித்த இளைஞர் பின்னர் நீதிமன்ற உத்தரவின் பேரில் பதுளை பிரதேசத்தில் அமைந்துள்ள புனர்வாழ்வு நிலையத்திற்கு அனுப்பி வைக்கப்பட்டுள்ளார்.
பின்னர் மேற்கொள்ளப்பட்ட மேலதிக விசாரணைகளில், இந்த இளைஞனின் காதலியான 25 வயதுடைய ஆடைத் தொழிற்சாலை ஊழியர் பற்றிய தகவல்களை பொலிஸார் வெளிப்படுத்த முடிந்தது. அவரிடம் மேற்கொள்ளப்பட்ட நீண்ட விசாரணைகளின் போது, கொள்ளையிடப்பட்ட பணத்தில் 518,000 ரூபாவும், அந்தப் பணத்தில் வாங்கப்பட்ட 118,000 ரூபா பெறுமதியான தங்க நகைகளும் கண்டுபிடிக்கப்பட்டுள்ளன. பின்னர் அவர் அளித்த வாக்குமூலங்களின் அடிப்படையில், கடுவெலவில் உள்ள வீட்டில் சந்தேகநபரான தந்தையும் பொலிஸ் காவலில் எடுக்கப்பட்டுள்ளார்.
