ஸ்ரீலங்கன் ஏர்லைன்ஸ் விமான நிறுவனத்திற்கு ஏர்பஸ் விமானங்களை கொள்வனவு செய்ததில் இடம்பெற்றதாக கூறப்படும் இலஞ்சம் தொடர்பில் பாராளுமன்ற உறுப்பினர் நாமல் ராஜபக்ஷவை சந்தேகநபராக பெயரிடுமாறு சட்டமா அதிபர் குற்றப் புலனாய்வுத் திணைக்களத்திற்கு பணிப்புரை விடுத்துள்ளார்.
இதுவரை மேற்கொள்ளப்பட்ட விசாரணைகளின்படி, இந்த வழக்கில் பிரதான சந்தேகநபர்களில் ஒருவரான கபில சந்திரசேன பெற்ற இலஞ்சப் பணத்தின் ஒரு பகுதி நாமல் ராஜபக்ஷவுக்கு வழங்கப்பட்டுள்ளதாக தகவல் வெளியாகியுள்ளது. இதுவே இதற்குக் காரணம். இதன்படி, சட்டமா அதிபரின் அறிவுறுத்தலின் பேரில், கோட்டை நீதவான் நீதிமன்றத்தில் மனு தாக்கல் செய்யப்பட்டு, வழக்கு விசாரணைக்கு எடுத்துக்கொள்ளப்பட்டு, நீதிமன்றத்திற்கு விடயங்கள் அறிவிக்கப்பட்டதன் பின்னர் நாமல் ராஜபக்ஷ சந்தேகநபராக பெயரிடப்படவுள்ளார்.
ஸ்ரீலங்கன் ஏர்லைன்ஸ் நிறுவனத்தின் முன்னாள் பிரதம நிறைவேற்று அதிகாரி கபில சந்திரசேன மற்றும் அவரது மனைவிக்கு எதிரான இந்த வழக்கு தற்போது கோட்டை நீதவான் நீதிமன்றத்தில் விசாரணையில் உள்ளது.
இந்த விமான ஒப்பந்தத்தில் 2014 மற்றும் 2015 ஆம் ஆண்டுகளில் பல சந்தர்ப்பங்களில் 100 இலட்சம் ரூபாய் இலஞ்சம் பெற்றதாக கூறப்படும் குற்றச்சாட்டுகளின் பேரில், இலஞ்சம் அல்லது ஊழல் விசாரணை ஆணைக்குழுவினால் அண்மையில் நாமல் ராஜபக்ஷ கைது செய்யப்பட்டார். கைது செய்யப்பட்ட பாராளுமன்ற உறுப்பினர் நாமல் ராஜபக்ஷவை எதிர்வரும் 18 ஆம் திகதி வரை விளக்கமறியலில் வைக்குமாறு நீதிமன்றம் உத்தரவிட்டுள்ளது. சந்தேகநபராக பெயரிடப்பட்ட பின்னர், குற்றப் புலனாய்வு அதிகாரிகளுக்கு அவரை விரிவாக விசாரிக்கும் வாய்ப்பு கிடைக்கும்.