ஈராக்கில் இருந்து நடத்தப்பட்ட ட்ரோன் தாக்குதல்கள் காரணமாக, சவுதி அரேபிய அதிகாரிகள் தங்கள் முக்கிய எண்ணெய் ஏற்றுமதி குழாய் மார்க்கங்களில் ஒன்றை தற்காலிகமாக மூடியுள்ளனர். மத்திய கிழக்கில் நிலவும் கடுமையான போர்ச் சூழலில், ஈரானால் ஹோர்முஸ் நீரிணை மூடப்பட்டதால் ஏற்பட்ட தடைகளைத் தவிர்ப்பதற்காக, சவுதி அரேபியா அப்காய்க் பகுதியிலிருந்து செங்கடலில் உள்ள யான்பு துறைமுகம் வரை செல்லும் "கிழக்கு-மேற்கு" குழாய் மார்க்கத்தின் பயன்பாட்டை கணிசமாக அதிகரித்திருந்தது.
ரியாத் மற்றும் மதீனா பகுதிகள் வழியாகச் செல்லும் இந்த எண்ணெய் குழாய் மார்க்கத்தை இலக்காகக் கொண்டு ஈராக் மண்ணிலிருந்து நடத்தப்பட்ட பல ட்ரோன் தாக்குதல்களை சவுதி வெளியுறவு அமைச்சகமும், எரிசக்தி அமைச்சகமும் கடுமையாகக் கண்டித்துள்ளன. இந்தத் தாக்குதல் காரணமாக முன்னெச்சரிக்கை நடவடிக்கையாக குழாய் மார்க்கத்தின் பணிகள் நிறுத்தப்பட்டதாகவும், சம்பவத்தில் சிலர் காயமடைந்து சொத்துக்களுக்கு சேதம் ஏற்பட்டுள்ளதாகவும் அதிகாரிகள் உறுதிப்படுத்தியுள்ளனர். கோப்பர்நிக்கஸ் சென்டினல் செயற்கைக்கோள்கள் மூலம் பெறப்பட்ட படங்களில், மதீனா பகுதிக்கு அருகில் குழாய் மார்க்கம் வழியாக கருப்பு புகை எழுவது பதிவாகியுள்ளது.
இந்தத் தாக்குதல் ஈராக்கின் மைசான் தெற்கு மாகாணத்திலிருந்து நடத்தப்பட்டதாக ஈராக் பிரதமர் அலி அல்-ஸாயிதியின் அலுவலகம் உறுதிப்படுத்தியுள்ளது. உடனடியாகச் செயல்பட்ட பிரதமர், சம்பந்தப்பட்ட மாகாணத்தின் இராணுவத் தளபதியை பதவியில் இருந்து நீக்க நடவடிக்கை எடுத்துள்ளார். தங்கள் மண்ணைப் பயன்படுத்தி சவுதி அரேபியா மீது நடத்தப்பட்ட இந்தத் தாக்குதலைக் கண்டிப்பதாக ஈராக் அரசு அறிவித்ததுடன், இது குறித்து முழுமையான விசாரணை ஆரம்பிக்கப்பட்டுள்ளதாகவும் குறிப்பிட்டது.
ஈராக் பிரதமரின் சிறப்பு வேண்டுகோளைக் கருத்தில் கொண்டு, இந்த நேரத்தில் இராணுவப் பதிலடியைத் தவிர்ப்பது என சவுதி அரேபியா தீர்மானித்துள்ளதுடன், ஈராக் மண்ணிலிருந்து நடத்தப்படும் தாக்குதல்களைத் தடுக்க அந்நாட்டு அரசு எடுக்கும் முயற்சிகளுக்கு ஆதரவளிக்க ஒப்புக்கொண்டுள்ளது. இருப்பினும், தங்கள் நாட்டின் பாதுகாப்பு மற்றும் சொத்துக்களைப் பாதுகாப்பதற்காக தேவையான எந்த நடவடிக்கையையும் எடுக்கும் முழு உரிமை தங்களிடம் இருப்பதாக ரியாத் நிர்வாகம் வலியுறுத்துகிறது. இதற்கிடையில், பஹ்ரைன், ஜோர்டான், கத்தார் மற்றும் வளைகுடா ஒத்துழைப்பு கவுன்சிலும் இந்தத் தாக்குதலை பிராந்திய பாதுகாப்புக்கு ஒரு தீவிர அச்சுறுத்தலாகக் கண்டித்துள்ளன.
பிராந்தியத்தில் ஏற்பட்டுள்ள இந்த அமைதியற்ற சூழ்நிலை காரணமாக உலக சந்தையில் ஒரு பீப்பாய் கச்சா எண்ணெயின் விலை 100 டாலர் எல்லையைத் தாண்டிச் சென்றுள்ளதுடன், அமெரிக்காவில் டீசல் விலையும் கணிசமாக அதிகரித்துள்ளது. இதற்கிடையில், யேமன் அரசுக்கு ஆதரவளிக்கும் சவுதி அரேபியாவுக்கு எதிராக ஹூதி கிளர்ச்சியாளர்கள் செங்கடலில் கடற்படைத் தடைகளை விதித்துள்ளனர். பாப் எல்-மண்டேப் நீரிணையில் உள்ள மூலோபாய தீவுகளின் கட்டுப்பாட்டை உறுதிப்படுத்திய ஹூதி அமைப்பு, சவுதி அரேபியாவைத் தவிர மற்ற அனைத்து நாடுகளின் கப்பல்களுக்கும் அங்கு போக்குவரத்து பாதுகாப்பானது என்று அறிவித்துள்ளது.