சட்டவிரோதமாக பொது வைப்பு நிதிகளைப் பெற்று நிதி வணிகங்களை நடத்தி வந்ததாக குற்றம் சாட்டப்பட்ட ஆறு நிறுவனங்கள் மற்றும் அவற்றின் பணிப்பாளர் சபைக்குச் சொந்தமான அனைத்து சொத்துக்களையும் உடைமைகளையும் மாற்றுவது, விற்பது அல்லது எந்தவொரு பரிவர்த்தனைக்கும் உட்படுத்துவதைத் தடுக்கும் வகையில் இலங்கை மத்திய வங்கி விதித்திருந்த இடைநிறுத்தல் உத்தரவுகள் கொழும்பு மேல் நீதிமன்றத்தால் உறுதிப்படுத்தப்பட்டு நீட்டிக்கப்பட்டுள்ளன. மத்திய வங்கியின் நிதி அல்லாத நிறுவனங்கள் மேற்பார்வைப் பிரிவினால் 2011 ஆம் ஆண்டின் 42 ஆம் இலக்க நிதி வணிகச் சட்டத்தின் 44 ஆம் பிரிவின் கீழ் வெளியிடப்பட்ட இந்த உத்தரவுகள் தொடர்பாக ஒரு விசேட அறிவிப்பை வெளியிட்டு மத்திய வங்கி இதனை வெளிப்படுத்தியுள்ளது.
இவ்வாறு சொத்துக்கள் இடைநிறுத்தப்பட்ட உத்தரவுக்கு உட்பட்ட நிறுவனங்களாக கசாகல கிரீன் பிளான்டேஷன் தனியார் நிறுவனம், சிலோன் கிரீன் லைஃப் பிளான்டேஷன் தனியார் நிறுவனம், சிங்ஹா கெப்பிட்டல் இன்வெஸ்ட்மென்ட் லிமிடெட், ப்ரோ ஷாப் அட்வர்டைசிங் ஹோல்டிங்ஸ் தனியார் நிறுவனம், ஏதென்ஸ் இன்டர்நேஷனல் எஜுகேஷன் சென்டர் தனியார் நிறுவனம் மற்றும் ஈயோன் லங்கா இன்வெஸ்ட்மென்ட் அண்ட் பிலிம் புரொடக்ஷன் இன்டர்நேஷனல் தனியார் நிறுவனம் ஆகியவை அடையாளம் காணப்பட்டுள்ளன. சம்பந்தப்பட்ட நீதிமன்றத் தீர்ப்புடன், இந்த நிறுவனங்களுக்கு அல்லது அவற்றின் பணிப்பாளர் சபைக்குச் சொந்தமான எந்தவொரு அசையும் அல்லது அசையாச் சொத்தையும் வேறு எந்த தரப்பினருக்கும் மாற்றுவது அல்லது விற்பது முற்றிலும் தடைசெய்யப்பட்டுள்ளது.
சம்பந்தப்பட்ட நிறுவனங்களில் கசாகல கிரீன் பிளான்டேஷன் மற்றும் சிலோன் கிரீன் லைஃப் பிளான்டேஷன் ஆகிய இரண்டு நிறுவனங்கள் தொடர்பாக நிதி வணிகச் சட்டத்தின் 42 ஆம் பிரிவின் கீழ் விசேட விசாரணைகள் ஏற்கனவே நடைபெற்று வருகின்றன. பட்டியலிடப்பட்ட மற்ற நான்கு நிறுவனங்கள் சம்பந்தப்பட்ட சட்டத்தின் 2 ஆம் பிரிவை மீறி, முறையான உரிமம் இன்றி பொதுமக்களிடமிருந்து வைப்பு நிதிகளைப் பெற்று நிதி வணிகங்களை நடத்தி வந்துள்ளதாக மத்திய வங்கி கண்டறிந்துள்ளது.
தாம் கஷ்டப்பட்டு சம்பாதிக்கும் பணத்தை பாதுகாப்பாக வைப்பிலிடுவதற்கு சட்டபூர்வமாக அங்கீகரிக்கப்பட்ட நிறுவனங்களை மட்டுமே தேர்ந்தெடுக்குமாறு மத்திய வங்கி பொதுமக்களை மேலும் கேட்டுக்கொள்கிறது. 1988 ஆம் ஆண்டின் 30 ஆம் இலக்க வங்கிச் சட்டம் அல்லது 2011 ஆம் ஆண்டின் 42 ஆம் இலக்க நிதி வணிகச் சட்டத்தின் கீழ் முறையான உரிமங்களைப் பெற்ற, அல்லது அந்தச் சட்டங்களால் திட்டவட்டமாக விலக்களிக்கப்பட்ட நிறுவனங்களுக்கு மட்டுமே பொது வைப்பு நிதிகளைப் பெறுவதற்கு முழுமையான சட்டபூர்வ அதிகாரங்கள் உள்ளன என்பதையும் 2026 செப்டம்பர் 22 ஆம் திகதியிடப்பட்டு வெளியிடப்பட்ட இந்த அறிவிப்பில் குறிப்பிடப்பட்டுள்ளது.
