நோர்வேயின் முன்னாள் மன்னர் ஹரால்டின் மறைவுக்குப் பிந்தைய இறுதிச் சடங்கில் கலந்துகொண்ட இரண்டு நாட்களுக்குப் பிறகு, அவரது மூத்த சகோதரியான இளவரசி அஸ்ட்ரிட் தனது 94வது வயதில் காலமானார். அரச மாளிகை வெளியிட்ட உத்தியோகபூர்வ அறிவிப்பில், வெள்ளிக்கிழமை அன்று அவர் காலமானதாகத் தெரிவிக்கப்பட்டுள்ளது.
35 ஆண்டுகளுக்கும் மேலாக நோர்வேயின் அரியணையில் அமர்ந்திருந்த 89 வயதான மன்னர் ஹரால்ட் கடந்த மாதம் காலமானார், கடந்த புதன்கிழமை நடைபெற்ற அவரது இறுதிச் சடங்கு இளவரசி அஸ்ட்ரிட் கடைசியாக பொதுவில் தோன்றிய சந்தர்ப்பமாகும். இளவரசியின் மறைவுக்கு இரங்கல் தெரிவித்த எட்டாம் ஹோகோன் மன்னர், அவர் தனது நீண்ட ஆயுட்காலம் முழுவதும் அரச மாளிகைக்காக அர்ப்பணிப்புடனும் நட்புறவுடனும் கடமைகளை நிறைவேற்றினார் என்று கூறினார்.
ஒஸ்லோவில் பிறந்த இளவரசி அஸ்ட்ரிட், ஐந்தாம் ஓலஃப் மன்னர் மற்றும் சுவீடனின் மார்த்தா பட்டத்து இளவரசியின் இரண்டாவது மகள் ஆவார். இரண்டாம் உலகப் போரின் போது, அதாவது 1940 இல் ஜேர்மனி நோர்வேயை ஆக்கிரமித்தபோது, அவர் தனது குடும்ப உறுப்பினர்களுடன் வாஷிங்டன் டி.சி.க்கு தப்பிச் சென்றார், மேலும் போர் முடிந்த பிறகு 1945 இல் தாய்நாடு திரும்பினார்.
1954 இல் தனது தாயின் திடீர் மறைவுக்குப் பிறகு, 22 வயதான இளவரசி அஸ்ட்ரிட் நோர்வேயின் "முதல் பெண்மணி" என்ற சவாலான பொறுப்புகளை ஏற்றுக்கொண்டார். அதன்படி, 1968 இல் இளவரசர் ஹரால்டின் திருமணம் நடக்கும் வரை, தனது தாத்தாவான ஏழாம் ஹோகோன் மன்னர் மற்றும் பின்னர் தனது தந்தையான ஐந்தாம் ஓலஃப் மன்னருடன் இணைந்து அரச மாளிகையின் ஏற்பாடுகளையும் உள்நாட்டிலும் வெளிநாட்டிலும் அரச பிரதிநிதித்துவங்களையும் அவர் மேற்கொண்டார்.
அவர் 1961 இல் நோர்வே வணிகரும் ஒலிம்பிக் படகோட்டியுமான யோஹான் மார்ட்டின் ஃபெர்னர் என்பவரை மணந்தார். அக்கால சமூகக் கருத்துக்களாலும் மரபுகளாலும் ஒரு சாதாரண குடிமகனை மணந்த இந்தத் திருமணம் பெரும் சர்ச்சையை ஏற்படுத்தியது. ஐந்து குழந்தைகளின் பெற்றோரான இந்தத் தம்பதியினர், 2015 இல் ஃபெர்னர் இறக்கும் வரை ஒன்றாக வாழ்ந்தனர்.
தனது தொண்ணூறுகளிலும் அவர் பல அரச கடமைகளிலும் ஆதரவுகளிலும் தீவிரமாக ஈடுபட்டார், மேலும் அரச கிரீடத்திற்கு பயனுள்ள வகையில் சேவை செய்வது தனது பொறுப்பு என்று தனது 93வது பிறந்தநாள் கொண்டாட்டத்தின் போது அவர் கூறியிருந்தார். மேலும், அவர் இறக்கும் வரை, பிரித்தானியாவின் விக்டோரியா மகாராணியின் உயிருடன் இருந்த பழமையான பரம்பரை பிரதிநிதியாகவும் இளவரசி அஸ்ட்ரிட் இருந்தார்.