ඇමරිකාවේ ප්රමුඛතම කෘත්රිම බුද්ධි (AI) සමාගමක් වන Anthropic හි 'Claude' චැට්බොට් පද්ධතිය භාවිත කරමින් යේමනයේ පදනම් වූ සන්නද්ධ කණ්ඩායමක් මිසයිල සහ රොකට් තාක්ෂණය සංවර්ධනය කිරීමට උත්සාහ කර ඇති බව අදාළ සමාගම අනාවරණය කරයි. නීති විරෝධී ලෙස AI තාක්ෂණය භාවිත කිරීම වැළැක්වීම සම්බන්ධයෙන් Anthropic සමාගම නිකුත් කළ නවතම වාර්තාවකට අනුව, උතුරු යේමනයේ සක්රිය තර්ජනාත්මක කණ්ඩායමක් විසින් ආයුධ සංවර්ධන ව්යාපෘති තුනක් සඳහා මෙම පද්ධතිය යොදාගෙන තිබේ.
එම ආයුධ ව්යාපෘති අතරට ජංගම දුරකථන පන්තියේ පියාසර පරිගණකයක් සහිත මඟපෙන්වන ලද රොකට්ටුවක්, කිලෝමීටර් 2,000 කට වඩා වැඩි පරාසයක් සහිත බහු-දර්ශීය බැලැස්ටික් මිසයිලයක් සහ අති-ධ්වනි (hypersonic) ග්ලයිඩ් යානා ප්රභේදයක් ඇතුළත් මිසයිල පද්ධතියක් ඇතුළත් වේ. සාමාන්යයෙන් විශාල ඉංජිනේරු කණ්ඩායමක දායකත්වය අවශ්ය වන පාලන, නාවික සහ මඟපෙන්වීමේ මෘදුකාංග නිර්මාණය කරගැනීමට අදාළ කණ්ඩායම මෙම AI චැට්බොට් පද්ධතිය භාවිත කර ඇත.
AI ආධාරයෙන් සකස් කළ මඟපෙන්වන රොකට්ටුවක් අත්හදා බැලීමේ පරීක්ෂණයක් ද මෙම කණ්ඩායම විසින් සිදු කර ඇති අතර, එම පරීක්ෂණය අසාර්ථක වී තිබේ. ඉන් පසුව පැය කිහිපයක් ඇතුළත එම අසාර්ථකත්වයට හේතු සොයාගැනීමට අදාළ කණ්ඩායම නැවතත් 'Claude' පද්ධතිය වෙත පැමිණි බව වාර්තාවේ සඳහන් වේ. කෙසේ වෙතත්, මෙම සන්නද්ධ කණ්ඩායම සාර්ථක ලෙස ක්රියාකාරී ආයුධයක් නිපදවූ බවට සාක්ෂි නොමැති අතර, අදාළ සැකකටයුතු ක්රියාකාරකම් හඳුනාගත් වහාම ඊට සම්බන්ධ ගිණුම් තහනම් කිරීමට Anthropic සමාගම පියවර ගෙන ඇත.
අදාළ වාර්තාවේ මෙම කණ්ඩායමේ නම සෘජුව දක්වා නොමැති වුවද, අගනුවර වන සානා ඇතුළු උතුරු යේමනයේ බලය හොබවන හූති කැරලිකරුවන් මෙයට සම්බන්ධ බවට විශ්වාස කෙරේ. යුරෝපය සහ ආසියාව යා කරන උපායමාර්ගික බැබ් අල්-මන්ඩැබ් සමුද්ර සන්ධිය දෙසට හූති බලකායන් දැඩි ප්රහාරාත්මක මෙහෙයුමක නිරත වන වටපිටාවක මෙම තොරතුරු අනාවරණය වී ඇත. එසේම, අදාළ නෞකා මාර්ගයේ පිහිටි රතු මුහුදේ දූපතක පාලනය තමන් සතු කරගත් බව ද හූති සංවිධානය පසුගියදා ප්රකාශ කළේය.
මීට අමතරව, 'Claude' මාදිලිය භාවිත කරමින් ජෛව ආයුධ සංවර්ධනය කිරීමට දැරූ උත්සාහයන් සහ උක්රේනයට එරෙහිව රුසියාවට සම්බන්ධ යැයි සැකකෙරෙන සයිබර් ඔත්තු බැලීමේ මෙහෙයුමක් ද ව්යර්ථ කිරීමට හැකි වූ බව Anthropic සමාගම පවසයි. එසේම, සිය AI පද්ධතියේ හැකියාවන් ලබාගැනීමට චීන තරඟකාරී පාර්ශ්වයන් සයිබර් ප්රහාර එල්ල කිරීමට උත්සාහ කළ බවට ද සමාගම චෝදනා කරයි. මේ අතර, වේගයෙන් වර්ධනය වන කෘත්රිම බුද්ධි තාක්ෂණය නුදුරු අනාගතයේදී මිනිස් සංහතියේ පැවැත්මටම තර්ජනයක් විය හැකි බවට Anthropic සමාගමේ පර්යේෂකයන් දෙදෙනෙකු ද අනතුරු අඟවා තිබේ.