யாழ்ப்பாணம், நல்லூர் பிரதேசத்தில் எவ்வித சட்டபூர்வ அனுமதியுமின்றி அமைக்கப்பட்டிருந்த விடுதலைப் புலிகள் அமைப்பின் முன்னாள் பிரதான ஆயுதப் போராளியான திலீபனின் சிலை இன்று (27) காலை பொலிஸாரால் அகற்றப்பட்டுள்ளது.
முன் அறிவித்தலின்றி வந்த பொலிஸ் அதிகாரிகள் குழுவொன்று நல்லூர் பிரதேச சபைக்குச் சொந்தமான காணியில் அமைந்திருந்த இந்த நினைவுச் சின்னத்தை அகற்றி எடுத்துச் சென்றுள்ளதுடன், திலீபன் நினைவேந்தலின் இறுதி நாள் நேற்று (26) முடிவடைந்திருந்தது.இலங்கையில் தடைசெய்யப்பட்ட பயங்கரவாத அமைப்பான விடுதலைப் புலிகளின் யாழ் அரசியல் பிரிவுத் தலைவராகச் செயற்பட்டு பின்னர் உயிரிழந்த திலீபனை நினைவுகூரும் வகையில் இந்தச் சிலை அண்மையில் ஒரு குழுவினரால் நிறுவப்பட்டிருந்தது. 'உடைந்த பனைமரம்' (The Broken Palmyra) என்ற நூலின்படி, 1987 ஜூலை 02 அன்று யாழ்ப்பாணம், உரும்பிராய் பிரதேசத்தில் தமிழ் இளைஞர்கள் கொல்லப்பட்டு மின் கம்பங்களில் கட்டப்பட்ட சம்பவத்துடன் இவர் தனிப்பட்ட முறையில் தொடர்புபட்டுள்ளார்.
இதற்கிடையில், அண்மையில் நல்லூர் நினைவேந்தல் திடலில் நடைபெற்ற 'தியாகம் தியாகி' திலீபன் நினைவேந்தல் நிகழ்வின்போதும் பொலிஸாருக்கும் ஏற்பாட்டாளர்களுக்கும் இடையே கடும் பதற்றமான நிலை ஏற்பட்டிருந்தது. குறித்த நினைவேந்தல் நிகழ்வுக்கு உத்தியோகபூர்வ அனுமதி பெறப்பட்டிருந்தபோதிலும், பொலிஸ் அதிகாரிகள் வந்து அங்கு இருந்த அனைத்து ஒலிபெருக்கி உபகரணங்களையும் கைப்பற்றியது இந்த பதற்றமான நிலைக்குக் காரணமாக அமைந்தது.
பெரிய அளவிலான ஒலிபெருக்கிகளைப் பயன்படுத்துவதற்கு விசேட பொலிஸ் அனுமதி தேவைப்பட்டாலும், தாங்கள் நினைவேந்தல் பாடல்களை இசைப்பதற்கு மிகக் குறைந்த ஒலியுடன் கூடிய சிறிய ஒலிபெருக்கிகளை மட்டுமே பயன்படுத்தியதாக ஏற்பாட்டாளர்கள் தெரிவிக்கின்றனர். எனவே, இவ்வாறானதொரு சூழ்நிலையில் பொலிஸார் அந்த சிறிய உபகரணங்களையும் கைப்பற்றியது சட்டவிரோத செயல் என ஏற்பாட்டாளர்களும் அதில் கலந்துகொண்டவர்களும் குற்றம் சாட்டுகின்றனர்.
