கிரிஉல்ல பொலிஸ் நிலைய அதிகாரிகளுக்கு கிடைத்த தகவலின்படி, பன்னல பிரதேசத்தில் மேற்கொள்ளப்பட்ட விசேட நடவடிக்கையின் போது, பொலிஸ் உத்தரவை மீறி தப்பிச் செல்ல முயன்ற மோட்டார் வாகனத்தின் டயர்களில் சுட்டு, அந்த வாகனத்தை பன்னல நகருக்கு அருகில் பொலிஸார் நிறுத்தினர். இன்று (22) இடம்பெற்ற இந்த துரத்தலில், போதைப்பொருள் கடத்தல்காரர் ஒருவர் உட்பட மூவர் கைது செய்யப்பட்டுள்ளனர்.
ஹாலிவுட் திரைப்படத்தின் காட்சி வரிசையைப் போன்ற இந்த சுற்றிவளைப்பின் வீடியோ தற்போது பலரால் பேசப்பட்டு வருகிறது.சந்தேகத்திற்கிடமான போதைப்பொருள் கடத்தல்காரர் ஒருவர் தொடர்பான தகவலின் பேரில், கிரிஉல்ல பொலிஸ் அதிகாரிகள் குழுவொன்று குறித்த மோட்டார் வாகனத்தை துரத்திச் சென்றுள்ளது. அப்போது வாகனத்தை நிறுத்தும்படி பொலிஸார் உத்தரவிட்ட போதிலும், சாரதி அதை மீறி தொடர்ந்து வாகனத்தை செலுத்தியுள்ளார். இதனால், பொலிஸ் அதிகாரிகள் வாகனத்தின் டயர்களில் சுட நடவடிக்கை எடுத்துள்ளனர்.
இறுதியில் பன்னல நகருக்கு அருகில் வாகனத்தை நிறுத்த முடிந்ததுடன், வாகனத்தை ஓட்டிச் சென்ற சந்தேகநபரான கடத்தல்காரரும், வாகனத்தின் பின் இருக்கையில் பயணித்த இரண்டு பெண்களும் பொலிஸ் காவலில் எடுக்கப்பட்டுள்ளனர். சந்தேகநபர்களைக் கைது செய்யும் போது, பொலிஸ் அதிகாரிகள் வாகனத்தைச் சுற்றி வளைத்து அதன் கண்ணாடியை உடைக்கும் காட்சிகள் குறித்த சம்பவத்தின் வீடியோவில் பதிவாகியுள்ளன.
இந்த நடவடிக்கையின் போது சந்தேகநபர்களிடமிருந்து 15.260 கிராம் ஹெரோயின் மற்றும் போதைப்பொருள் கடத்தல் மூலம் சம்பாதித்ததாக சந்தேகிக்கப்படும் 924,770 ரூபாய் பணமும் பொலிஸ் காவலில் எடுக்கப்பட்டுள்ளது.
