வணிகங்களில் முதலீடு செய்வதாகக் கூறி கோடீஸ்வர வர்த்தகர்களிடமிருந்து கோடிக்கணக்கான ரூபாய்களை மோசடி செய்த குற்றச்சாட்டுகளைப் பெற்று பிணையில் விடுவிக்கப்பட்டுள்ள திக்கோ குழும நிறுவனங்களின் உரிமையாளர் திலினி பிரியமாலியை உடனடியாகக் கைது செய்து நீதிமன்றத்தில் ஆஜர்படுத்துமாறு கோட்டை நீதவான் பசன் அமரசேன அவர்கள் குற்றப் புலனாய்வுத் திணைக்களத்திற்கு உத்தரவிட்டுள்ளார்.
அவருக்கு எதிராகத் தாக்கல் செய்யப்பட்ட வழக்கு விசாரணைக்கு அழைக்கப்பட்டபோது சந்தேகநபர் திறந்த நீதிமன்றத்தில் ஆஜராகாதது இந்த பிடியாணை பிறப்பிக்க முக்கிய காரணமாக அமைந்துள்ளது. மேலும், சந்தேகநபருக்காக பிணையாளர்களாக நீதிமன்றத்தில் ஆஜரான இருவர் உண்மையில் பிணை வழங்கியவர்கள் அல்ல என்பது தெரியவந்ததும் இதற்குக் காரணமாக அமைந்தது. அதன்படி, சந்தேகநபர் இல்லாமல் வழக்கை 192வது பிரிவின் கீழ் முன்னெடுத்துச் செல்லுமாறு குற்றப் புலனாய்வுத் திணைக்களத்திற்கு உத்தரவிட்ட நீதவான், திலினி பிரியமாலிக்காக உண்மையாகவே பிணை வழங்கிய பிணையாளர்களுக்கு அடுத்த வழக்கு தினத்தில் நீதிமன்றத்தில் ஆஜராகுமாறு அறிவித்து நோட்டீஸ் வழங்கவும் நடவடிக்கை எடுத்தார்.
திலினி பிரியமாலி உட்பட ஆறு பேருக்கு எதிராகத் தாக்கல் செய்யப்பட்டுள்ள இந்த பண மோசடி குற்றச்சாட்டுகள் தொடர்பான வழக்குகள் விசாரணைக்கு அழைக்கப்பட்டபோது மேலும் சில சந்தேகநபர்கள் நீதிமன்றத்தில் ஆஜராகவில்லை, அவர்களுக்குப் பதிலாக பிணையாளர்கள் மட்டுமே ஆஜராகியுள்ளனர். இதில் மற்றொரு சந்தேகநபராக உள்ள ஜானகி சிறிவர்தன தற்போது வேறு ஒரு வழக்கு தொடர்பாக விளக்கமறியலில் வைக்கப்பட்டுள்ளார் என்று அவரது சட்டத்தரணி நீதிமன்றத்திற்கு அறிவித்தார். மேலும், இந்த சம்பவம் தொடர்பாக பிணையில் விடுவிக்கப்பட்டுள்ள பொரளை சிறிசுமன தேரர் அன்று நீதிமன்றத்தில் ஆஜரானார், அவர் வெளிநாடு செல்வதற்காகச் செய்த விண்ணப்பத்திற்கு நீதிமன்றம் அனுமதி வழங்கியது.
சம்பந்தப்பட்ட வழக்கு விசாரணைகளின் அடுத்த கட்ட நடவடிக்கைகளுக்காக வழக்கு அடுத்த நவம்பர் மாதம் 17 ஆம் திகதிக்கு ஒத்திவைக்க நீதவான் உத்தரவிட்டார். மேலும், திலினி பிரியமாலி உட்பட குழுவினருக்கு எதிராகத் தாக்கல் செய்யப்பட்டுள்ள மற்ற அனைத்து வழக்குகளும் அடுத்த ஆண்டு மார்ச் 31 ஆம் திகதி மீண்டும் விசாரணைக்கு அழைக்கவும் நீதிமன்றம் மேலும் உத்தரவிட்டது.