2026 செப்டம்பர் 30 அன்று, துபாயில் இருந்து இஸ்ரேலின் டெல் அவிவ் நோக்கிப் பறந்து கொண்டிருந்த ஃப்ளைதுபாய் (flydubai) விமானம் சவுதி அரேபியாவின் தபூக் நகரில் அவசரமாகத் தரையிறக்கப்பட்டது. விமானிகள் இருவருக்கும் இடையே விமானியின் அறையில் ஏற்பட்ட கடுமையான சண்டை மற்றும் கத்திக்குத்து இதற்கு காரணம் என்று கூறப்படுகிறது.
FZ1073 என்ற இந்த போயிங் 737 MAX 8 விமானத்தில் 150 முதல் 180 பயணிகள் பயணித்துள்ளனர், அவர்களில் பெரும்பாலானோர் இஸ்ரேலியர்கள். இந்த சம்பவம் தொடர்பாக விமான நிறுவனம் ஒரு அறிக்கையை வெளியிட்டு, சம்பந்தப்பட்ட விமானம் பாதுகாப்பாக தரையிறக்கப்பட்டதாகவும், அதில் பயணித்த அனைத்து பயணிகளும் பாதுகாப்பாக இருப்பதாகவும் தெரிவித்துள்ளது.விமானம் சுமார் 34,000 அடி உயரத்தில் பறந்து கொண்டிருந்தபோது, சவுதி-ஜோர்டான் எல்லையை அண்மித்த பகுதியில் திடீரென அதன் கட்டுப்பாடு இழந்தது. ரேடார் தரவுகளின்படி, 30 வினாடிகளுக்கும் குறைவான நேரத்தில் விமானம் சுமார் 14,000 அடிக்கு மிக ஆபத்தான முறையில் கீழே விழுந்தது. பின்னர், விமானியின் அறையிலிருந்து ஒரு பொதுவான அவசர நிலையை குறிக்கும் 7700 குறியீடும், அதைத் தொடர்ந்து விமான கடத்தல் அல்லது சட்டவிரோத தலையீட்டைக் குறிக்கும் 7500 குறியீடும் வெளியிடப்பட்டது. சுமார் ஒரு மணி நேரம் அசாதாரணமாகப் பயணித்த இந்த விமானம் இறுதியில் சவுதி அரேபியாவின் தபூக் விமான நிலையத்தில் பாதுகாப்பாக தரையிறக்கப்பட்டது. தரையிறங்கிய பிறகு எடுக்கப்பட்ட புகைப்படங்கள் விமானத்தின் பின் சுக்கானுக்கு (rudder) சில சேதங்கள் ஏற்பட்டிருப்பதைக் காட்டுகின்றன, ஆனால் இது குறித்து விமான நிறுவனம் இதுவரை கருத்து தெரிவிக்கவில்லை.
சம்பவத்தை எதிர்கொண்ட பயணிகள் கூறியபடி, விமானம் வேகமாக கீழே விழுந்து கொண்டிருந்தபோது விமானியின் அறையிலிருந்து பெரும் சத்தம் கேட்டது. பின்னர், முன் இருக்கைகளில் இருந்த பயணிகள் விமானியின் அறைக்கு ஓடிச் சென்று பார்த்தபோது, ஒரு விமானி மற்றொரு விமானியை சட்டைப் பையில் இருந்த கத்தியால் குத்தி கீழே தள்ளியிருப்பதைக் கண்டனர். இரத்தம் தோய்ந்த ஆடைகளுடன் இருந்த பயணிகளின் புகைப்படங்களும் தற்போது இஸ்ரேலிய ஊடகங்களுக்கு வெளியிடப்பட்டுள்ளன. சில பயணிகள் இணைந்து தாக்குதல் நடத்தியவரை அகற்றியுள்ளனர், மேலும் விமானத்தில் பயணித்த கடமையில் இல்லாத வேறு இரண்டு விமானிகள் விமானத்தின் கட்டுப்பாட்டை தங்கள் கைகளில் எடுத்துக்கொண்டனர். காயமடைந்த விமானியின் உயிரைக் காப்பாற்ற விமானத்தில் இருந்த ஒரு இஸ்ரேலிய பல் மருத்துவர் முதலுதவி அளித்ததாகவும் கூறப்படுகிறது.
தபூக் விமான நிலைய அதிகாரிகள், பிரதான விமானிக்கு பலத்த காயங்கள் ஏற்பட்டுள்ளதாகவும், துணை விமானிக்கு லேசான காயங்கள் ஏற்பட்டுள்ளதாகவும் தெரிவித்துள்ளனர். இருவரும் தற்போது மருத்துவமனையில் அனுமதிக்கப்பட்டுள்ளனர். இது ஒரு பயங்கரவாத செயலா அல்லது விமானி விமானத்தை வீழ்த்தி தற்கொலை செய்து கொள்ளும் முயற்சியாகவா என்பது குறித்து இஸ்ரேலிய பாதுகாப்புப் படைகள் தற்போது விசாரணைகளைத் தொடங்கியுள்ளன. விமானிகளின் தேசிய இனம் தொடர்பாகவும் முரண்பட்ட தகவல்கள் வெளியாகியுள்ளன, சில ஆதாரங்கள் அவர்கள் ரஷ்ய மற்றும் உக்ரேனியர்கள் என்றும், வேறு சில ஆதாரங்கள் தாக்குதல் நடத்தியவர் ஓமான் நாட்டைச் சேர்ந்தவர் என்றும் கூறுகின்றன. இருப்பினும், ஃப்ளைதுபாய் நிறுவனமோ அல்லது ஐக்கிய அரபு எமிரேட்ஸ் அதிகாரிகளோ இதுவரை எதையும் அதிகாரப்பூர்வமாக உறுதிப்படுத்தவில்லை, மேலும் பயணிகளை மீண்டும் டெல் அவிவ் அழைத்துச் செல்ல துபாயில் இருந்து மற்றொரு விமானம் புறப்பட்டுள்ளது.
