வணக்கத்துக்குரிய கலாகொடஅத்தே ஞானசார தேரருக்கு ஜனாதிபதி மன்னிப்பு வழங்குமாறு அரசாங்கத்திடம் கோருவதற்காக ஐம்பது இலட்சம் கையொப்பங்களை சேகரிக்கும் விசேட மனு இயக்கம் இன்று (26) மிஹிந்தலை புனித பூமியில் இருந்து ஆரம்பிக்கப்பட்டது.
மிஹிந்தலை ராஜமகா விகாரையின் அதிபதி வணக்கத்துக்குரிய கலாநிதி வளவாஹங்குணவெவே தம்மரதன தேரர் உட்பட மகா சங்கத்தினர் இந்த நிகழ்வில் கலந்துகொண்டு மனுவில் முதலில் கையெழுத்திட்டனர்.
கலாகொடஅத்தே ஞானசார தேரருக்கு ஜனாதிபதி மன்னிப்பு வழங்குமாறு நடவடிக்கை எடுக்குமாறு ஜனாதிபதி அநுர குமார திஸாநாயக்கவிடம் கோரிய மிஹிந்தலை ராஜமகா விகாரையின் அதிபதி தேரர், சேகரிக்கப்படும் அனைத்து கையொப்பங்களையும் மகாநாயக்க தேரர்களிடம் முதலில் ஒப்படைப்பதற்கும், பின்னர் ஜனாதிபதியிடம் சமர்ப்பிப்பதற்கும் நடவடிக்கை எடுக்கப்படும் என்று அங்கு தெரிவித்தார்.
நீதிமன்ற அவமதிப்பு குற்றத்திற்காக ஆறு வருட சிறைத்தண்டனை விதிக்கப்பட்டிருந்த ஞானசார தேரருக்கு 2019 ஆம் ஆண்டில் முன்னாள் ஜனாதிபதி மைத்திரிபால சிறிசேனவினால் ஜனாதிபதி மன்னிப்பு வழங்கப்பட்டிருந்தது. ஆனால் அந்த மன்னிப்பு செல்லுபடியற்றது என்று உயர் நீதிமன்றம் கடந்த செப்டம்பர் 10 ஆம் திகதி தீர்ப்பளித்தது, அதன்படி அவருக்கு எதிரான அடுத்த சட்ட நடவடிக்கைகள் தற்போது நடைமுறையில் உள்ளன.