பாணந்துறை, நல்லூருவ பிரதேசத்தில் அமைந்துள்ள ஆடம்பரமான மூன்று மாடி வீட்டை சுற்றி வளைத்து, போதைப்பொருள் கடத்தலுடன் தொடர்புடைய பொருட்களை பாணந்துறை கோட்ட குற்றப் புலனாய்வுப் பிரிவினர் கைப்பற்றியுள்ளனர். வெளிநாட்டில் வசிக்கும் ஒழுங்கமைக்கப்பட்ட குற்றவாளியான 'பாணந்துறை குடு சலிந்து' என்பவரின் போதைப்பொருள் வலையமைப்பை வெளிநாடுகளில் இருந்து இயக்கும் 'ரந்திக' என்பவரின் முக்கிய சீடரான 'டி.ஜே. சத்து' தனது கள்ளக்காதலியுடன் மாதத்திற்கு 70,000 ரூபாய் வாடகைக்கு இந்த வீட்டில் வசித்து வந்தது விசாரணைகளில் தெரியவந்துள்ளது.
இந்த வீடு வாடகைக்கு எடுக்கப்பட்டிருந்தாலும், தொடர்ந்து பூட்டப்பட்டிருந்ததால் ஏற்பட்ட சந்தேகத்தின் பேரில், பாணந்துறை கோட்ட குற்றப் புலனாய்வுப் பிரிவுக்கு கிடைத்த இரகசிய தகவலின் அடிப்படையில் இந்த சுற்றிவளைப்பு மேற்கொள்ளப்பட்டுள்ளது. அங்கு, ஹெராயின் மொத்தமாக விநியோகிக்கும் போது மாதிரிகளைக் காட்டுவதற்காக தயாரிக்கப்பட்ட ஐந்து சிறிய பொட்டலங்கள், போதைப்பொருட்களை பொதி செய்வதற்காக பல்வேறு சின்னங்கள் அச்சிடப்பட்ட காகிதங்கள், அவற்றை அச்சிடப் பயன்படுத்தப்படும் விசேட காகிதக் கட்டு மற்றும் ஒரு காகிதம் வெட்டும் இயந்திரம் என்பவற்றை அதிகாரிகள் கைப்பற்றியுள்ளனர்.
அத்துடன், அந்த வீட்டில் இருந்து மூன்று கையடக்கத் தொலைபேசிகள், தங்க முலாம் பூசப்பட்ட நகைகள் மற்றும் பாதுகாப்பு கேமரா அமைப்புகளின் இயக்கத் தரவுகளைக் கொண்ட மெமரி கார்டுகளும் கண்டுபிடிக்கப்பட்டுள்ளன. மூன்று மாடி வீட்டின் கீழ் தளத்திலிருந்து மேல் தளம் வரை வீட்டின் உள்ளேயும் வெளியேயும் உள்ளடங்கும் வகையில் பொருத்தப்பட்டிருந்த சிசிடிவி கேமரா அமைப்பு, கையடக்கத் தொலைபேசிகள் மூலம் எந்த இடத்திலிருந்தும் கண்காணிக்கக்கூடிய வகையில் அமைக்கப்பட்டிருந்ததாகவும் குறிப்பிடப்பட்டுள்ளது.
வெளிநாடுகளில் உள்ள நபர்களுடன் நேரடியாக தொடர்பு கொள்ளக்கூடிய வகையில் பெரிய திரைகள் மற்றும் விசேட தகவல் தொடர்பு தொழில்நுட்ப உபகரணங்கள் பொருத்தப்பட்டு அமைக்கப்பட்ட ஒரு அறையும் வீட்டில் பராமரிக்கப்பட்டு வந்துள்ளது. சுற்றிவளைப்பு நடந்தபோது சந்தேக நபர்கள் தப்பிச் சென்றுள்ளனர். பெரிய அளவிலான போதைப்பொருள் கடத்தல்காரரான 'டி.ஜே. சத்து' உள்ளிட்டோரை கைது செய்வதற்கான மேலதிக விசாரணைகளை பொலிஸார் மேற்கொண்டு வருகின்றனர்.
