கொழும்பு கொம்பனித்தெரு பிரதேசத்தில் ஒரு கடையின் மறைவில் மிகவும் இரகசியமாக நடத்தப்பட்டு வந்த நிலத்தடி இரவு விடுதி ஒன்றை சுற்றிவளைத்து, அங்கு இருந்த மதுபானக் கையிருப்பை கைப்பற்ற கலால் திணைக்கள அதிகாரிகள் கடந்த 21ஆம் திகதி வெற்றி பெற்றுள்ளனர். கொழும்பு கலால் திணைக்களத்தின் விசேட நடவடிக்கைப் பிரிவின் அதிகாரிகளுக்கு கிடைத்த தகவலின் அடிப்படையில் இந்த நடவடிக்கை மேற்கொள்ளப்பட்டுள்ளது.
வெளியில் முறுக்கு உள்ளிட்ட சிற்றுண்டிகள் மற்றும் பானங்கள் விற்கும் இடமாகத் தோன்றும் வகையில் அமைக்கப்பட்டிருந்த இந்த இடத்தில், இந்த நிலத்தடி இரவு விடுதி மிகவும் நுட்பமாக வடிவமைக்கப்பட்டிருந்தது விசாரணைகளில் தெரியவந்துள்ளது. விற்பனைக்கு வைக்கப்பட்டிருந்த முறுக்கு பொதிகள் கொண்ட அலமாரியை அகற்றிய பின்னரே, அந்த வளாகத்திற்குள் நுழையும் இரகசிய இடத்தையும் இரவு விடுதியையும் விசாரணை அதிகாரிகள் கண்டுபிடிக்க முடிந்தது.
சட்டவிரோதமாக வெளிநாட்டு மதுபானங்களை விற்பனை செய்து வந்த இந்த இடத்திற்கு தினமும் ஒரு குறிப்பிட்ட எண்ணிக்கையிலான வாடிக்கையாளர்கள் வந்து சென்றுள்ளனர் என்பது விசாரணைகளில் உறுதி செய்யப்பட்டுள்ளது. சுற்றிவளைப்பு நடந்தபோது, விற்பனைக்காக தயார் நிலையில் வைக்கப்பட்டிருந்த வெளிநாட்டு மதுபான போத்தல்களின் கையிருப்பும் கலால் திணைக்கள அதிகாரிகளால் கைப்பற்றப்பட்டுள்ளது.
எந்தவொரு அரசாங்க உரிமமோ அல்லது முன் அனுமதியோ இன்றி நடத்தப்பட்டு வந்த இந்த இரவு விடுதி தொடர்பாக எதிர்காலத்தில் சட்ட நடவடிக்கை எடுக்க கலால் திணைக்களம் ஏற்பாடுகளை செய்து வருகிறது.
