ரிமாண்ட் சிறையில் அடைக்கப்பட்டுள்ள ஸ்ரீலங்கா பொதுஜன பெரமுனவின் தேசிய அமைப்பாளர் நாமல் ராஜபக்ஷவுக்கு ஆசி வேண்டி மாத்தறை வரலாற்று சிறப்புமிக்க போதி மரத்தடியில் ஏற்பாடு செய்யப்பட்டிருந்த போதி பூஜை நிகழ்வுக்கு அந்த இடத்தை வழங்க முடியாது என மாத்தறை போதி பாதுகாப்பு சபை அறிவித்ததை அடுத்து, அந்த நிகழ்வை வேறு இடத்தில் நடத்த ஏற்பாட்டாளர்கள் நிர்ப்பந்திக்கப்பட்டுள்ளனர்.
இந்த நிகழ்வை நேற்று (21) மாலை 4.00 மணிக்கு மாத்தறை போதி வளாகத்தில் நடத்துவதற்காக ஸ்ரீலங்கா பொதுஜன பெரமுனவின் கம்புருப்பிட்டிய தொகுதி அமைப்பாளர் கீர்த்தி விஜயவன்ச, 300 ரூபாய் நன்கொடை செலுத்தி முன்கூட்டியே நேரத்தை ஒதுக்கியிருந்தார். எவ்வாறாயினும், நாமல் ராஜபக்ஷவுக்கு ஆசி வேண்டி நடத்தப்படும் இந்த போதி பூஜையில் கலந்துகொள்ளுமாறு சமூக ஊடகங்கள் மூலம் பிரச்சாரம் செய்யப்பட்டதை அடுத்து, குறித்த இடத்தை வழங்க முடியாது என மாத்தறை போதியின் பிரதிநிதி ஒருவர் கீர்த்தி விஜயவன்சவுக்கு அறிவித்துள்ளார்.
அதன் பின்னர் குறித்த நிகழ்வை ஹித்தாட்டிய ராஜ மகா விகாரையில் நடத்த தீர்மானிக்கப்பட்டதுடன், இந்த திடீர் நிலைமை குறித்து கலந்துரையாடுவதற்காக நேற்று முன்தினம் (20) இரவு மாத்தறையில் அமைந்துள்ள கட்சி அலுவலகத்தில் விசேட சந்திப்பு ஒன்று நடத்தப்பட்டுள்ளது.
இத்தேகந்தே சத்தாதிஸ்ஸ தேரரின் தலைமையில் நடைபெற்ற அந்த கலந்துரையாடலில் கோட்டே தொகுதி அமைப்பாளர் மிலிந்த ராஜபக்ஷ உட்பட மாத்தறை மாவட்டத்தின் தொகுதி அமைப்பாளர்கள் மற்றும் பல செயற்பாட்டாளர்கள் கலந்துகொண்டனர். அங்கு எதிர்வரும் 24ஆம் திகதி மாலை 4.00 மணிக்கு தெவிநுவர புனித பூமியில் இந்த போதி பூஜை நிகழ்வை நடத்துவதற்கு ஒருமனதாக யோசனைகள் உறுதிப்படுத்தப்பட்டன.
முன்கூட்டியே நேரம் ஒதுக்கப்பட்டிருந்தும் மாத்தறை போதி வளாகத்தை வழங்க நடவடிக்கை எடுக்காதது குறித்து மாத்தறை போதி பாதுகாப்பு சபைக்கு ஏற்பாட்டாளர்களிடமிருந்து கடுமையான விமர்சனங்கள் எழுந்துள்ளன. இந்த சம்பவம் குறித்து மாத்தறை போதி பாதுகாப்பு சபையிடம் விளக்கம் கேட்க முயற்சித்த போதிலும் அது தோல்வியடைந்ததுடன், இந்த முடிவு பெரும்பான்மையினரின் ஒப்புதலுடன் எடுக்கப்பட்டதல்ல, மாறாக சில தனிநபர்களின் முடிவு என்றும் தெரிவிக்கப்பட்டுள்ளது.