கசிப்பு கடத்தல்காரர் மற்றும் பல்வேறு குற்றச் செயல்களுடன் தொடர்புடையவர் எனக் கூறப்படும் ஒருவரின் வீட்டிற்குச் சென்று மதுபான விருந்து நடத்தியதாகக் கூறப்படும் சம்பவம் தொடர்பில் காத்தான்குடி பொலிஸ் நிலையத்தில் கடமையாற்றிய பொலிஸ் கான்ஸ்டபிள் ஒருவர் இடைநிறுத்தப்பட்டுள்ளார். மட்டக்களப்பு உதவிப் பொலிஸ் அத்தியட்சகர் (1) நடத்திய ஒழுங்குப் பரிசோதனைக்குப் பின்னர், இந்த அதிகாரியின் கடமைகள் கடந்த 1ஆம் திகதி முதல் அமுலுக்கு வரும் வகையில் இவ்வாறு இடைநிறுத்தப்பட்டுள்ளன.
இந்த கான்ஸ்டபிள், தனது நண்பர்கள் எனக் கருதப்படும் மேலும் இருவருடன் கடந்த 29ஆம் திகதி காத்தான்குடி பிரதேசத்தில் வசிக்கும் குறித்த கடத்தல்காரரின் வீட்டிற்குச் சென்றுள்ளதாக பொலிஸார் தெரிவித்தனர். அங்கு அவர்கள் அந்த வீட்டின் பின்புறமுள்ள கடற்கரைக்குச் சென்று நால்வரும் ஒன்றாக மது அருந்தி விருந்து நடத்தியுள்ளனர்.
விருந்தின் போது, கான்ஸ்டபிளுடன் வந்த இருவரில் ஒருவருக்கும், குறித்த குற்றச் செயல்களுடன் தொடர்புடையவர் எனக் கூறப்படும் நபருக்கும் இடையில் வாக்குவாதம் ஏற்பட்டுள்ளது. அப்போது ஏற்பட்ட தாக்குதலில் கடத்தல்காரர் எனக் கூறப்படும் நபரின் நான்கு பற்கள் உடைந்துள்ளதாக பொலிஸ் வட்டாரங்கள் தெரிவிக்கின்றன. அந்த சந்தர்ப்பத்தில், பற்கள் உடைந்த நபரால் தடியால் தாக்கப்பட்டதால் மற்ற நபரின் தலையிலும் காயங்கள் ஏற்பட்டுள்ளன, மேலும் அவர்கள் இருவரும் சிகிச்சைக்காக வைத்தியசாலையில் அனுமதிக்கப்பட்டுள்ளனர்.
இந்த மோதலில் பற்கள் உடைந்த நபருக்கு எதிராக கசிப்பு கடத்தல், துப்பாக்கியால் சுட்டு கொலை செய்ய முயற்சி மற்றும் ஒருவரைத் தாக்கி காயப்படுத்தியமை போன்ற குற்றச்சாட்டுகளின் கீழ் பல வழக்குகள் நீதிமன்றத்தில் விசாரணையில் உள்ளதாக மட்டக்களப்பு உயர் பொலிஸ் அதிகாரி ஒருவர் தெரிவித்துள்ளார். இவ்வாறான குற்றப் பின்னணி கொண்ட நபர் எனத் தெரிந்தும் அவருடன் நெருங்கிய உறவு வைத்துக்கொண்டு மதுபான விருந்தில் கலந்துகொண்டமை தொடர்பில் இடைநிறுத்தப்பட்ட கான்ஸ்டபிளுக்கு எதிராக மேலதிக விசாரணைகள் நடைபெற்று வருவதாகவும் பொலிஸார் மேலும் தெரிவித்தனர்.