தடுத்து வைக்கப்பட்டுள்ள சக்திவாய்ந்த குற்றவாளியான 'லொக்கு பெட்டி' என்பவரின் சகோதரரான 'பொடி பெட்டி' அடையாளம் தெரியாத துப்பாக்கிதாரியால் சுடப்பட்டு உயிரிழந்துள்ளார். அஹுங்கல்ல, வெலிகந்த பிரதேசத்தில் நேற்று (01) இரவு 8.10 மணியளவில் இந்த கொலை இடம்பெற்றுள்ளதுடன், தலையில் ஏற்பட்ட துப்பாக்கிச் சூட்டுக் காயங்களால் படுகாயமடைந்த அவர் வைத்தியசாலைக்கு கொண்டு செல்லும் வழியில் உயிரிழந்துள்ளார்.
பிரதேசத்தில் உள்ள தங்குமிடமொன்றில் வர்ணம் பூசும் தொழிலில் ஈடுபட்டிருந்த குறித்த நபர், சம்பவம் இடம்பெற்ற அன்று தனது வீட்டில் மற்றுமொரு நண்பருடன் மது அருந்தியுள்ளார். பின்னர் அந்த நண்பர் வெளியேறிய நிலையில், மற்றொரு பீர் போத்தலுடன் மீண்டும் வீட்டிற்கு வந்த அவர் தனது மனைவியுடன் பேசிக்கொண்டிருந்தபோது இந்த தாக்குதல் நடத்தப்பட்டுள்ளது. நடந்து வந்த துப்பாக்கிதாரி 9 மில்லிமீட்டர் ரக பிஸ்டலால் சுட்டுவிட்டு, பின்னர் வீட்டின் அருகிலுள்ள காட்டுப் பகுதி வழியாக தப்பிச் சென்றுள்ளதாக பொலிஸார் தெரிவித்தனர்.
எந்தவொரு குற்றச்சாட்டுகளுக்கும் உள்ளாகாத உயிரிழந்த நபர், ஒரு திருமணமான பெண்ணுடனும் அவரது ஏழு வயது மகளுடனும் குறித்த வீட்டில் வசித்து வந்துள்ளார். அவர் தற்போது வெளிநாட்டில் தலைமறைவாக உள்ள ஒழுங்கமைக்கப்பட்ட குற்றவாளியான 'அஹுங்கல்லே மதுஷன்' என்பவரின் சகோதரி ஆவார். ஒரு காலத்தில் லொக்கு பெட்டியின் கும்பலுடன் நெருக்கமாக செயற்பட்ட மதுஷன், பின்னர் அதிலிருந்து விலகி வெளிநாட்டில் உள்ள சக்திவாய்ந்த குற்றவாளியான 'கொஸ்கொட சுஜீ' என்பவருடன் தொடர்புகளை ஏற்படுத்திக்கொண்டார். இதன் காரணமாக மதுஷனின் சகோதரிக்கும் பொடி பெட்டிக்கும் இடையிலான உறவுக்கு லொக்கு பெட்டியும் அவரது மற்றொரு சகோதரரான 'அஹுங்கல்லே சஞ்சீவ'வும் கடுமையாக எதிர்ப்பு தெரிவித்திருந்தமை விசாரணைகளில் தெரியவந்துள்ளது.
எவ்வாறாயினும், இந்த கொலையை கொஸ்கொட சுஜீயின் தரப்பு இயக்கியிருக்கலாம் என பொலிஸார் கடுமையாக சந்தேகிக்கின்றனர். இதற்கு முன்னரும், அதாவது கடந்த ஏப்ரல் 16 ஆம் திகதி அஹுங்கல்ல பிரதேசத்தில் இவரை டி-56 ரக துப்பாக்கியால் சுட்டுக்கொல்ல கொஸ்கொட சுஜீயின் தரப்பு முயற்சித்த போதிலும், அவர் அதிலிருந்து தப்பி உயிர் பிழைத்திருந்தார். அத்துடன், கொஸ்கொட சுஜீயின் நெருங்கிய நண்பரான லியனகமகே லஹிரு அல்லது 'லஹிரு தில்ஷான்' என்பவரிடமிருந்தும் இவருக்கு பல சந்தர்ப்பங்களில் மரண அச்சுறுத்தல்கள் விடுக்கப்பட்டிருந்ததாக தெரிவிக்கப்படுகிறது.
சில நாட்களுக்கு முன்னர் லொக்கு பெட்டியின் போதைப்பொருள் கடத்தலை இயக்கியதாக கூறப்படும் களு நோனா உட்பட மூவர் பத்தேகமவில் கொல்லப்பட்டனர், அதன் குற்றச்சாட்டு 'கரந்தெனிய சுத்தா'வின் தரப்பு மீது சுமத்தப்பட்டது. இந்த சமீபத்திய கொலை சம்பவத்திற்குப் பிறகு, பொலிஸார் அப்பகுதியை தீவிரமாக தேடினர், ஆனால் துப்பாக்கிதாரி குறித்து இதுவரை எந்த துப்பும் கிடைக்கவில்லை. இச்சம்பவம் தொடர்பான மேலதிக விசாரணைகள் எல்பிட்டிய பிரிவுக்கு பொறுப்பான சிரேஷ்ட பொலிஸ் அத்தியட்சகர் லக்கி ரந்தெனியவின் முழு மேற்பார்வையின் கீழ் மூன்று பொலிஸ் குழுக்களால் தற்போது மேற்கொள்ளப்பட்டு வருகின்றன.