அனர்த்த நிவாரணத்திற்காக - தொலைத்தொடர்பு வலையமைப்புகள் மூலம் இலவச அழைப்புகள் மற்றும் டேட்டா

 தீவு முழுவதும் நிலவும் சீரற்ற காலநிலை காரணமாகப் பாதிக்கப்பட்ட மக்களின் தொலைத்தொடர்பு வசதிகளைத் தொடர்ச்சியாகப் பேணுவது மற்றும் மீட்டெடுப்பது குறித்து டிஜிட்டல் பொருளாதார விவகாரங்களுக்கான பிரதி அமைச்சர் எரங்க வீரரத்ன தலைமையில் 2025 நவம்பர் 28 அன்று ஒரு விசேட கலந்துரையாடல் நடைபெற்றது.

தொலைத்தொடர்பு ஒழுங்குபடுத்தும் ஆணைக்குழுவின் (TRCSL) அதிகாரிகள், அனர்த்த முகாமைத்துவ மத்திய நிலையத்தின் (DMC) பிரதிநிதிகள், முப்படை அதிகாரிகள் மற்றும் முன்னணி தொலைத்தொடர்பு சேவை நிறுவனங்களின் பிரதிநிதிகள் கலந்துகொண்ட இச்சந்திப்பில், அனர்த்தத்தால் பாதிக்கப்பட்டவர்களுக்கு விசேட நிவாரணங்களை வழங்குவதற்கு அனைத்துத் தரப்பினரும் இணக்கம் தெரிவித்துள்ளனர்.

கனமழை மற்றும் மண்சரிவுகள் காரணமாக ஃபைபர் (Fiber) வலையமைப்பு அமைப்புகளுக்கு ஏற்பட்ட சேதங்களால் கண்டி, பதுளை மற்றும் அனுராதபுரம் உள்ளிட்ட பல மாவட்டங்களில் தொலைத்தொடர்பு சேவைகளுக்கு இடையூறுகள் ஏற்பட்டுள்ளதாக இங்கு தெரியவந்துள்ளது.

மின்சாரம் தடைபடுவது தொலைத்தொடர்பு கோபுரங்களின் செயற்பாட்டிற்கு ஒரு முக்கிய தடையாக இருப்பதால், சம்பந்தப்பட்ட பகுதிகளில் மின்சாரத்தை விரைவாக வழங்குமாறு தொலைத்தொடர்பு நிறுவனங்கள் அதிகாரிகளிடம் கோரிக்கை விடுத்தன. அனர்த்த காலப்பகுதியில் போஸ்ட்பெய்ட் (Postpaid) வாடிக்கையாளர்களின் கடன் வரம்பு மீறப்பட்டாலும் அவர்களின் தொலைபேசி இணைப்புகளைத் துண்டிக்க வேண்டாம் என்றும் இங்கு தீர்மானிக்கப்பட்டது.

மேலும், ப்ரீபெய்ட் (Prepaid) வாடிக்கையாளர்களுக்காக விசேட டேட்டா (Data) மற்றும் அழைப்பு நிவாரணப் பொதிகள் அறிமுகப்படுத்தப்பட்டுள்ளன. டயலொக் (Dialog) மற்றும் ஏர்டெல் (Airtel) வாடிக்கையாளர்கள் #006# என்ற எண்ணை அழைப்பதன் மூலம் 3 நாட்களுக்கு செல்லுபடியாகும் எந்தவொரு வலையமைப்புக்கும் 250 நிமிடங்கள், 250 குறுஞ்செய்திகள் (SMS) மற்றும் 1GB டேட்டா சலுகையைச் செயற்படுத்திக்கொள்ளலாம்.

ஹட்ச் (Hutch) வாடிக்கையாளர்கள் 3111# என்ற எண்ணை அழைப்பதன் மூலம் 3 நாட்களுக்கு எந்தவொரு வலையமைப்புக்கும் 300 நிமிடங்கள் மற்றும் 1000MB டேட்டாவை இலவசமாகப் பெற்றுக்கொள்ளலாம். மொபிடெல் (Mobitel) வாடிக்கையாளர்கள் YES என டைப் செய்து 7677 என்ற எண்ணுக்கு SMS அனுப்புவதன் மூலம் எந்தவொரு வலையமைப்புக்கும் 300 நிமிடங்கள், 300 குறுஞ்செய்திகள் மற்றும் 1GB டேட்டா வசதிகளைப் பெற்றுக்கொள்ள முடியும்.

மேலும், SLT-Mobitel நிறுவனம் நிலையான தொலைபேசி வாடிக்கையாளர்களுக்கு இலவச அழைப்பு வசதிகளை வழங்கியுள்ளதுடன், ஃபைபர் (Fibre), ஹோம் 4G LTE மற்றும் ADSL உள்ளிட்ட வீட்டு பிராட்பேண்ட் வாடிக்கையாளர்களுக்கு நவம்பர் 29 ஆம் திகதி காலை 7.00 மணி வரை வரம்பற்ற இணைய வசதிகளை (Unlimited Data) இலவசமாக வழங்க நடவடிக்கை எடுத்துள்ளது.