களுபோவில, சரணங்கர வீதியில் அமைந்துள்ள போதியாவத்த பிரதேசத்தில் இடம்பெற்ற துப்பாக்கிச் சூட்டில் 16 வயது சிறுமி காயமடைந்து வைத்தியசாலையில் அனுமதிக்கப்பட்டுள்ளதாக பொலிஸார் தெரிவிக்கின்றனர். மோட்டார் சைக்கிளில் வந்த இருவரே இந்த துப்பாக்கிச் சூட்டை நடத்தியுள்ளதாக ஆரம்பகட்ட தகவல்கள் வெளியாகியுள்ளன.
மோட்டார் சைக்கிளில் வந்த அடையாளம் தெரியாத இரு துப்பாக்கிதாரிகள் அப்பகுதியில் உள்ள வீடொன்றை இலக்கு வைத்து சுட்டுவிட்டு தப்பிச் சென்றுள்ளதாக ஆரம்பகட்ட விசாரணைகளில் தெரியவந்துள்ளது.
இந்த துப்பாக்கிச் சூட்டை நடத்தியவர்களுக்கு இலக்கு தவறிவிட்டதாக விசாரணைகளை மேற்கொள்ளும் பொலிஸ் குழுக்கள் தற்போது சந்தேகிக்கின்றன. துப்பாக்கிச் சூட்டுக்கு இலக்கான வீட்டிற்கு அருகிலுள்ள மற்றொரு வீடே அவர்களின் உண்மையான இலக்காக இருந்திருக்கலாம் என நம்பப்படுகிறது.
காயமடைந்த சிறுமி தற்போது சிகிச்சைக்காக வைத்தியசாலையில் அனுமதிக்கப்பட்டுள்ளார். இருப்பினும், அவரது தற்போதைய உடல்நிலை குறித்து வைத்தியசாலை அதிகாரிகள் இதுவரை எந்த அறிக்கையும் வெளியிடவில்லை.
சம்பவம் தொடர்பில் மேலதிக விசாரணைகளை கொஹுவளை பொலிஸார் மேற்கொண்டு வருகின்றனர்.