கிரீன் கார்டுக்கு விண்ணப்பித்தாலும் அமெரிக்க விசா மறுக்கப்படும் 19 நாடுகளை டிரம்ப் அறிவித்தார்!

 அமெரிக்க ஜனாதிபதி டொனால்ட் ட்ரம்பின் நிர்வாகம், குறிப்பிட்ட 19 நாடுகளில் இருந்து வரும் நபர்களை இலக்காகக் கொண்டு, சட்டப்பூர்வ குடியேற்ற செயல்முறையை கடுமையாக கட்டுப்படுத்த நடவடிக்கை எடுத்துள்ளது. இந்த புதிய உத்தரவின் மூலம், சம்பந்தப்பட்ட நாடுகளின் குடிமக்களின் விசா, கிரீன் கார்டு (Green Card) மற்றும் குடியுரிமை பெறுவதற்கான விண்ணப்பங்களைச் செயல்படுத்துவது உடனடியாக அமுலுக்கு வரும் வகையில் இடைநிறுத்தப்பட்டுள்ளது.

அமெரிக்க குடியுரிமை மற்றும் குடியேற்ற சேவைகள் (USCIS) இந்த நடவடிக்கையை எடுத்துள்ளது. குடியேற்ற செயல்முறையின் இறுதி கட்டத்தில் உள்ள விண்ணப்பதாரர்களுக்கும் இந்த தடை பொருந்தும் என்பதால், ஒப்புதல் பெறவிருந்த பலரின் எதிர்பார்ப்புகள் இதனால் நிச்சயமற்ற நிலைக்குத் தள்ளப்பட்டுள்ளன.

இந்த நடவடிக்கை, குடியேற்றச் சட்டத் துறையில் பலரால் சட்டப்பூர்வ குடியேற்றச் செயல்முறைக்கு ஒரே நேரத்தில் "பிரேக் போடுவது" (slams the brakes) என்று வர்ணிக்கப்படுகிறது. புதிய பாதுகாப்பு ஏற்பாடுகள் மற்றும் பின்னணி சரிபார்ப்பு விதிகள் அறிவிக்கப்படும் வரை, எந்தவொரு விண்ணப்பத்தையும் அங்கீகரிக்கவோ அல்லது நிராகரிக்கவோ அதிகாரிகளுக்கு அனுமதி இல்லை. மேலும், குடியுரிமைக்கான சத்தியப்பிரமாண நிகழ்வுகளும் இதன் கீழ் நிறுத்தப்பட்டுள்ளன. சம்பந்தப்பட்ட நாடுகளில் இருந்து வந்து ஏற்கனவே ஒப்புதல் பெற்றுள்ள கிரீன் கார்டு வைத்திருப்பவர்களின் கோப்புகளை மீண்டும் முழு அளவிலான கடுமையான பரிசோதனைக்கு உட்படுத்துமாறு ட்ரம்ப் நிர்வாகம் உத்தரவிட்டுள்ளது. இது ஏற்கனவே அங்கீகரிக்கப்பட்ட விசாக்களை ரத்து செய்யும் அபாயத்தையும் எழுப்புகிறது.

இந்த முடிவால் முக்கியமாகப் பாதிக்கப்படுவது ஐரோப்பியரல்லாத, பெரும்பாலும் முஸ்லிம் பெரும்பான்மை கொண்ட அல்லது அதிக ஆபத்துள்ள நாடுகளாக வகைப்படுத்தப்பட்டுள்ள 19 நாடுகளின் குடிமக்கள்தான். அவர்களின் குடும்ப அடிப்படையிலான அல்லது வேலை அடிப்படையிலான குடியேற்ற விண்ணப்பங்களுக்கு காலவரையற்ற தாமதங்கள் ஏற்படும். குடியேற்ற உரிமைகளுக்காகப் போராடும் குழுக்கள் சுட்டிக்காட்டுவது என்னவென்றால், இந்த கூடுதல் "பாதுகாப்புச் சோதனைகள்" செயல்முறை காரணமாக USCIS நிறுவனத்தின் பணிகள் தாமதமாகி, மற்ற அனைத்து நாடுகளின் விண்ணப்பதாரர்களும் விசா பெறுவதற்கான வரிசைகளில் அதிக நேரம் காத்திருக்க வேண்டியிருக்கும்.

இந்தக் குடியேற்ற இடைநிறுத்தம் மற்றும் மறுபரிசீலனை செயல்முறைக்கு உட்படுத்தப்படும் "குறிப்பிட்ட கவனம் செலுத்தப்படும் 19 நாடுகள்" (countries of concern) என ஆப்கானிஸ்தான், மியான்மர் (பர்மிய), சாட், காங்கோ குடியரசு, ஈக்வடோரியல் கினி, எரித்திரியா, ஹைட்டி, ஈரான், லிபியா, சோமாலியா, சூடான், யேமன், புருண்டி, கியூபா, லாவோஸ், சியரா லியோன், டோகோ, துர்க்மெனிஸ்தான் மற்றும் வெனிசுலா ஆகிய நாடுகள் பெயரிடப்பட்டுள்ளன. இதன் மூலம், இந்த நாடுகளின் குடிமக்கள் கிரீன் கார்டு மற்றும் பிற குடியேற்ற சலுகைகளைப் பெறுவதில் கடுமையான தடைகளை எதிர்கொள்ள நேரிடும்.