நிலவும் சீரற்ற காலநிலை காரணமாக ஏற்படக்கூடிய வெள்ள அபாயத்தைக் கருத்தில் கொண்டு, சோமாவதி புனிதத் தலத்திற்கு செல்லும் வீதியை தற்காலிகமாக மூடுவதற்கு பொலன்னறுவை மாவட்ட அனர்த்த முகாமைத்துவப் பிரிவு தீர்மானித்துள்ளது. கடும் மழையுடன் இந்த வீதி வெள்ளத்தில் மூழ்கும் அபாயம் உள்ளதால், மறு அறிவித்தல் வரும் வரை இந்த நடவடிக்கை அமுலில் இருக்கும் என அந்தப் பிரிவின் உதவிப் பணிப்பாளர் தெரிவித்தார்.
இதற்கிடையில், தொடர்ச்சியாக பெய்து வரும் மழை காரணமாக விக்டோரியா, ரந்தெனிகல மற்றும் ரந்தம்பே நீர்த்தேக்கங்கள் நிரம்பி வழியத் தொடங்கியுள்ளதாக மகாவலி அதிகார சபை தெரிவித்துள்ளது. நிலவும் மழை நிலவரத்திற்கேற்ப, ரந்தம்பே நீர்த்தேக்கத்திலிருந்து மினிப்பே அணைக்கட்டு வழியாக மகாவலி ஆற்றுக்கு வெளியேற்றப்படும் நீரின் அளவு எதிர்காலத்தில் மேலும் அதிகரிக்கலாம் என்றும் அந்த அதிகார சபை சுட்டிக்காட்டியுள்ளது.
லோகல் ஓயா, தியபானா ஓயா, ஹேபொல ஓயா மற்றும் உல்ஹிட்டிய நீர்த்தேக்கங்களின் வழிந்தோடும் நீரும், பதுளை ஓயாவின் நீர் கொள்ளளவும் நேரடியாக மகாவலி ஆற்றுடன் கலக்கின்றன.
இந்த நிலைமை காரணமாக, மகாவலி ஆற்றின் கீழ் பள்ளத்தாக்கு பகுதிகளில் வசிக்கும் மக்கள் மிகவும் கவனமாகவும் விழிப்புடனும் செயல்பட வேண்டும் என்று மகாவலி அதிகார சபை எச்சரிக்கை விடுத்துள்ளது.
கலாவெவ நீர்ப்பிடிப்புப் பகுதியைச் சேர்ந்த கலாவெவ மற்றும் கண்டலம நீர்த்தேக்கங்களும் தற்போது நிரம்பி வழிகின்றன, அத்துடன் மாதுருஓயா நீர்த்தேக்கமும் அதன் அதிகபட்ச நீர்மட்டத்தை எட்டியுள்ளது. மேலும், போவத்தென்ன, இபன்கட்டுவ, மொரகஹகந்த மற்றும் களு கங்கை நீர்த்தேக்கங்களின் நீர்மட்டம் தற்போது உச்ச வரம்பில் உள்ளதால், நீர்ப்பிடிப்புப் பகுதிகளுக்கு கிடைக்கும் மழைப்பொழிவைப் பொறுத்து எதிர்காலத்தில் அந்த நீர்த்தேக்கங்களும் நிரம்பி வழியலாம் என அதிகாரிகள் மேலும் தெரிவித்தனர்.