மோட்டார் வாகன ஓட்டுநர் குறைபாட்டுப் புள்ளிகள் வழங்கும் முறை இந்த ஆண்டு நடைமுறைப்படுத்தப்படும் என்று மோட்டார் வாகனப் போக்குவரத்து ஆணையாளர் கமல் அமரசிங்க தெரிவித்தார்.
அதற்கான தொழில்நுட்பப் பணிகள் தற்போது நடைபெற்று வருவதாகவும் அவர் கூறினார். அதற்கான முறை இலங்கை காவல்துறை, போக்குவரத்து அமைச்சு, மோட்டார் வாகனப் போக்குவரத்துத் திணைக்களம் மற்றும் டிஜிட்டல் பொருளாதார அமைச்சு ஆகிய நிறுவனங்களின் நிபுணர்களைக் கொண்ட குழுவினால் தயாரிக்கப்பட்டு வருவதாகவும் அவர் தெரிவித்தார்.
புதிய முறைமையின் கீழ், GovPay மூலம் அபராதங்களை இணையவழியில் செலுத்தும் சேவை ஆரம்பிக்கப்பட்டவுடன், ஓட்டுநரின் போக்குவரத்து விதிமீறல்களுக்கான குறைபாட்டுப் புள்ளிகள் கணக்கிடப்படும். ஒரு ஓட்டுநருக்கு அதிகபட்சமாக 24 குறைபாட்டுப் புள்ளிகள் வழங்கப்படும். இந்த அனைத்துப் புள்ளிகளும் இழக்கப்பட்டால், அந்த ஓட்டுநரின் சாரதி அனுமதிப்பத்திரம் இரண்டு வருடங்களுக்கு இடைநிறுத்தப்படும்.