தனது வர்த்தக கணவரைத் தாக்கி, சேலையால் கழுத்தை நெரித்துக் கொன்ற பின்னர், உடலை மாடியில் இருந்து கீழே தள்ளியதாகக் குற்றம் சாட்டப்பட்ட 53 வயதுடைய மனைவி ஒருவர் ராகம பொலிஸ் குற்றப் புலனாய்வுப் பிரிவினரால் நேற்று முன்தினம் (24) சந்தேகத்தின் பேரில் கைது செய்யப்பட்டுள்ளார். இவ்வாறு கொலை செய்யப்பட்டவர் கணேமுல்ல, வெலிப்பிள்ளாவ பிரதேசத்தைச் சேர்ந்த 60 வயதுடைய சுசந்த தம்மிக என்ற வர்த்தகர் ஆவார்.
இச்சம்பவம் தொடர்பில் ராகம பொலிஸாருக்கு முதலில் தகவல் தெரிவித்தவர் உயிரிழந்த வர்த்தகர் தம்மிகவின் மகள் சுரஞ்சி இசாங்கா ஆவார். தனது தந்தை வீட்டின் மாடியில் இருந்து விழுந்து இறந்துவிட்டதாக அவர் கூறியுள்ளார். அந்த அறிக்கையின்படி, பொலிஸ் சார்ஜன்ட் அபேகோன் (50195) உட்பட ராகம பொலிஸ் அதிகாரிகள் குழுவொன்று உடனடியாக அந்த வீட்டிற்குச் சென்று ஆரம்பகட்ட விசாரணைகளை ஆரம்பித்தனர்.
ஆரம்பகட்ட பொலிஸ் விசாரணைகளில் இந்த மரணம் சந்தேகத்திற்குரியது என்ற தகவல் தெரியவந்தது. அதன்படி, சம்பவம் குறித்த தகவல் அறிக்கை வெலிசர நீதிமன்றத்தில் சமர்ப்பிக்கப்பட்டது. வெலிசர பதில் நீதவான் எம். குணவர்தன சம்பவம் நடந்த வீட்டிற்குச் சென்று களப் பரிசோதனை நடத்திய பின்னர், மரணம் தொடர்பில் பிரேத பரிசோதனை நடத்துமாறு வட கொழும்பு ராகம போதனா வைத்தியசாலையின் சட்ட மருத்துவ அதிகாரிக்கு உத்தரவிட்டார்.
ராகம பொலிஸ் குற்றப் புலனாய்வுப் பிரிவின் அதிகாரிகள் மேற்கொண்ட மேலதிக விசாரணைகளில் தெரியவந்த தகவல்களின் அடிப்படையில், உயிரிழந்த வர்த்தகரின் மனைவி சந்தேகத்தின் பேரில் கைது செய்யப்பட்டார். சம்பவம் நடந்த இரவில் கணவன் மனைவி இருவரும் வீட்டின் மாடியில் இருந்தபோது அவர்களுக்குள் வாக்குவாதம் ஏற்பட்டதாகத் தகவல்கள் வெளியாகியுள்ளதாக ஒரு சிரேஷ்ட பொலிஸ் அதிகாரி லங்கா தீப பத்திரிகைக்குத் தெரிவித்துள்ளார்.
பொலிஸ் தகவல்கள் மற்றும் விசாரணைகளில் தெரியவந்துள்ளதாவது, கணவன் மனைவி இருவருக்கும் இடையில் ஏற்பட்ட அந்த வாக்குவாதத்தின் போது சந்தேகத்திற்குரிய மனைவி தனது வர்த்தக கணவரைத் தாக்கியுள்ளார். அதன்பின்னர், அவர் அணிந்திருந்த சேலையை எடுத்து அவரது கழுத்தை நெரித்துக் கொலை செய்துள்ளதாகவும், பின்னர் உடலை மாடியில் இருந்து கீழே தள்ளியுள்ளதாகவும் தெரிவிக்கப்பட்டுள்ளது.
இவ்வாறு செய்யப்பட்டிருப்பது கணவர் மாடியில் இருந்து விழுந்து இறந்துவிட்டதாக வீட்டில் இருந்த மற்றவர்களுக்கு நம்பவைக்கும் நோக்குடன் என விசாரணைகளில் உறுதி செய்யப்பட்டுள்ளது. இந்த அனைத்து தகவல்களும், சந்தேகத்தின் பேரில் கைது செய்யப்பட்ட வர்த்தகரின் மனைவியிடம் மேற்கொள்ளப்பட்ட விசாரணைகளில் தெரியவந்துள்ளதாக பொலிஸ் தகவல்கள் தெரிவிக்கின்றன.