கொழும்பு நீதவான் நீதிமன்ற வளாகத்தில் கணேமுல்ல சஞ்சீவ என்பவரை சுட்டுக் கொன்ற சம்பவத்தின் பிரதான சந்தேகநபர்களுக்கு உதவிய குற்றச்சாட்டில் தடுத்து வைக்கப்பட்டு விசாரிக்கப்படும் சட்டத்தரணி தமரா குமாரி அபேரத்ன, போலி அடையாள அட்டையைப் பயன்படுத்தி அரச வங்கியில் எட்டு (8) கணக்குகளைப் பராமரித்து வந்துள்ளதாக இரகசியப் பொலிஸார் கொழும்பு பிரதான நீதவான் அசங்க எஸ். போதரகம் அவர்களுக்கு நேற்று (19) அறிவித்தனர்.
பிறந்த திகதியை மட்டும் மாற்றி தயாரிக்கப்பட்ட இந்த போலி அடையாள அட்டை மூலம் கடவத்தை பிரதேசத்தில் உள்ள அரச வங்கியில் குறித்த எட்டு கணக்குகளும் திறக்கப்பட்டுள்ளதாகவும், அதன் மூலம் பல இலட்சம் ரூபா பணம் புழக்கத்தில் விடப்பட்ட பின்னர் அந்தக் கணக்குகள் மூடப்பட்டுள்ளதாகவும் விசாரணைகளில் தெரியவந்துள்ளது. அத்துடன், கடவத்தை மஹபோதி மாவத்தையில் வசிக்கும் தமரா குமாரி அபேரத்ன என்ற இந்த சந்தேகநபரான சட்டத்தரணி, கடவத்தையில் உள்ள ஒரு தனியார் வங்கியில் பராமரித்து வந்த தனது சட்டபூர்வமான கணக்கு மூலம் கடந்த மூன்று வருட காலப்பகுதியில் சுமார் இருபத்தி நான்கு கோடி (240 மில்லியன்) ரூபா பெறுமதியான பாரிய நிதி பரிவர்த்தனைகளை மேற்கொண்டுள்ளதாகவும் இரகசியப் பொலிஸார் நீதிமன்றத்திற்கு அறிவித்தனர்.
கணேமுல்ல சஞ்சீவ கொலை தொடர்பாக கைது செய்யப்பட்ட கெஹெல்பத்தார பத்ம என்ற சந்தேகநபரிடமிருந்து கிடைத்த தகவலின் அடிப்படையில் இந்த சட்டத்தரணி கைது செய்யப்பட்டுள்ளார். கொலைக்கு பயன்படுத்தப்பட்ட துப்பாக்கியை நீதிமன்ற வளாகத்திற்குள் கொண்டு வர தண்டனைச் சட்டம் மற்றும் மேலும் இரண்டு சட்ட நூல்களை வழங்கியமை தொடர்பில் அவரிடம் விசாரணை நடத்தப்படுகிறது. மேலும், கொலையைச் செய்த 'கமாண்டோ சலிந்த' என்ற துப்பாக்கிதாரருக்கும், அதன் மூளையாகக் கருதப்படும் பிம்புர தேவகே இஷாரா செவ்வந்தி என்ற பெண்ணுக்கும் சட்டத்தரணிகள் போன்று வேடமிடுவதற்காக கறுப்பு கோட்டுகள், சட்டத்தரணி சின்னம் பொறித்த டை பட்டிகள், அவரது கையொப்பத்துடன் கூடிய போலி சட்டத்தரணி அடையாள அட்டைகளை உருவாக்கி கொடுத்தமை மற்றும் அவர்கள் வந்த வாகனங்களுக்கு நீதிமன்ற வளாகத்திற்குள் நுழைவதற்கான உத்தியோகபூர்வ சின்னங்களை வழங்கியமை தொடர்பாகவும் அவர் இரகசியப் பொலிஸாரின் தீவிர விசாரணைகளுக்கு உட்படுத்தப்பட்டு வருகிறார்.
இந்த சந்தேகநபரைக் கைது செய்தபோது பொலிஸாரால் பொறுப்பேற்கப்பட்ட சுமார் இரண்டரை கோடி ரூபா பெறுமதியான ஹோண்டா வெசல் ரக மோட்டார் வாகனத்தை கொள்வனவு செய்தது தொடர்பாகவும் மேலதிக விசாரணைகள் நடைபெற்று வருகின்றன. குறித்த மோட்டார் வாகனம் சந்தேகநபரின் மகனின் மாமனார் பெயரில் கொள்வனவு செய்யப்பட்ட ஒன்று என விசாரணை அதிகாரிகள் நீதிமன்றத்திற்கு சுட்டிக்காட்டினர்.
கணேமுல்ல சஞ்சீவ கொலைக்கு உதவிய குற்றச்சாட்டில் விளக்கமறியலில் வைக்கப்பட்டுள்ள கம்பஹா பிரிவுக் குற்றப் புலனாய்வுப் பிரிவின் முன்னாள் உதவிப் பொலிஸ் பரிசோதகர் நிரோஷன் உதித் உதயசாந்தவுக்கு எதிரான வழக்கு அழைக்கப்பட்டபோது, இரகசியப் பொலிஸார் சம்பந்தப்பட்ட விசாரணை முன்னேற்ற அறிக்கையை நீதிமன்றத்தில் சமர்ப்பித்தனர். சிறைச்சாலை அதிகாரிகள் வாட்ஸ்அப் தொழில்நுட்பம் மூலம் சந்தேகநபரான முன்னாள் பொலிஸ் பரிசோதகரை நீதிமன்றத்தில் ஆஜர்படுத்தினர். பயங்கரவாதத் தடுப்புச் சட்டத்தின் கீழ் அவர் தொடர்பில் மேலதிக விசாரணைகள் மேற்கொள்ளப்பட்டு வருவதால், அவரை மேலும் விளக்கமறியலில் வைக்குமாறு இரகசியப் பொலிஸார் கோரினர். சமர்ப்பிக்கப்பட்ட விடயங்களைக் கருத்தில் கொண்ட பிரதான நீதவான், சந்தேகநபரை அடுத்த மாதம் 05ஆம் திகதி வரை மீண்டும் விளக்கமறியலில் வைக்க உத்தரவிட்டார்.