அதிகாரிகளுக்கு அறிவிக்காமல் வெளிநாடு சென்ற காரணத்தினால், ஓய்வுபெற்ற கத்தோலிக்க சகோதர ஆசிரியரின் ஓய்வூதியத்தை இடைநிறுத்த ஓய்வூதிய பணிப்பாளர் நாயகம் எடுத்திருந்த தீர்மானத்தை மேன்முறையீட்டு நீதிமன்றம் ரத்து செய்துள்ளது. அதன்படி, சம்பந்தப்பட்ட ஓய்வுபெற்ற ஆசிரியருக்கு உடனடியாக ஓய்வூதியத்தை வழங்குமாறு ஓய்வூதிய பணிப்பாளர் நாயகத்திற்கு நீதிமன்றம் ரிட் ஆணை பிறப்பித்து உத்தரவிட்டுள்ளது.
சின்னப்பு செல்லத்துரை என்ற சம்பந்தப்பட்ட ஓய்வுபெற்ற ஆசிரியர் சகோதரரால் தாக்கல் செய்யப்பட்ட ரிட் மனுவை விசாரித்த பின்னரே இந்தத் தீர்ப்பு அறிவிக்கப்பட்டது. மேன்முறையீட்டு நீதிமன்ற நீதிபதிகளான தம்மிக கணேபொல மற்றும் ஆதித்ய பட்டபெந்திகே ஆகியோர் அடங்கிய நீதிபதிகள் குழாம் முன்னிலையில் இந்த மனு விசாரணைக்கு எடுத்துக்கொள்ளப்பட்டது. ஓய்வூதிய பணிப்பாளர் நாயகம் மற்றும் கல்வி அமைச்சின் செயலாளர் உள்ளிட்டோர் இதில் பிரதிவாதிகளாக பெயரிடப்பட்டிருந்தனர். நீதிபதி தம்மிக கணேபொலவின் ஒப்புதலுடன் மேன்முறையீட்டு நீதிமன்ற நீதிபதி ஆதித்ய பட்டபெந்திகே அவர்களால் தீர்ப்பு அறிவிக்கப்பட்டது.
இந்த மனுதாரர் ஆசிரியராகப் பணிபுரியும் போது, எந்தவொரு உத்தியோகபூர்வ அறிவிப்பும் இன்றி சேவைக்காக பாகிஸ்தான் சென்றுள்ளார். பின்னர் மீண்டும் இலங்கை திரும்பி மன்னார் சேவியர் கல்லூரியில் ஆசிரியராக மீண்டும் பணிக்குச் சேர்ந்துள்ளார். அங்கு பணிபுரியும் போது அவருக்கு ஓய்வூதிய அனுமதி கிடைத்துள்ளது என்றும், 60 வயது பூர்த்தியானதும் அவர் முறையாக ஓய்வுபெற்றுள்ளார் என்றும் நீதிமன்றத் தீர்ப்பில் குறிப்பிடப்பட்டுள்ளது. ஆனால் அவர் ஓய்வூதியம் கோரியபோது, முன்கூட்டியே அறிவிக்காமல் சேவையை விட்டுச் சென்றதன் மூலம் நிறுவனக் கோவைகளுக்கு முரணாகச் செயல்பட்டுள்ளார் என்று கூறி, பிரதிவாதியான ஓய்வூதிய பணிப்பாளர் நாயகம் ஓய்வூதியம் வழங்குவதை மறுத்துள்ளார். இந்தத் தீர்ப்பினால் பாதிக்கப்பட்ட மனுதாரர் இது குறித்து இலங்கை மனித உரிமைகள் ஆணைக்குழுவிலும் முறைப்பாடு செய்திருந்தார்.
மனு விசாரணையின் போது மனுதாரர் சார்பில் ஆஜரான ஜனாதிபதி சட்டத்தரணி ஜெஃப் அழகரத்தினம், தனது கட்சிக்காரர் அறிவிக்காமல் வெளிநாடு சென்றதால் சேவையை விட்டு விலகியதாகக் கருதப்படும் எந்தவொரு உத்தியோகபூர்வ கடிதமும் அவருக்கு கிடைக்கவில்லை என்றும், எனவே அவர் எந்த வகையிலும் நிறுவனக் கோவைகளை மீறவில்லை என்றும் சுட்டிக்காட்டினார். இருப்பினும், பிரதிவாதிகள் சார்பில் ஆஜரான சிரேஷ்ட அரச சட்டத்தரணி கலாநிதி பீஷன் குணரத்ன, அதிகாரிகளுக்கு முன் அறிவித்தல் இன்றி பாகிஸ்தான் சென்றதால் அவருக்கு ஓய்வூதியம் பெறுவதற்கு சட்டபூர்வ உரிமை இல்லை என்று வாதிட்டார்.
சமர்ப்பிக்கப்பட்ட அனைத்து விடயங்களையும் மற்றும் முன்னுதாரண தீர்ப்புகளையும் பரிசீலித்த நீதிபதிகள் குழாம், மனுதாரர் தொடர்பான தீர்மானங்களை எடுக்கும்போது ஓய்வூதிய பணிப்பாளர் நாயகம் இயற்கை நீதிக் கோட்பாடுகளுக்கு இணங்க செயல்படவில்லை என்று தீர்மானித்தது. அதன்படி, மனுதாரரின் ஓய்வூதியத்தை ரத்து செய்து வெளியிடப்பட்ட கடிதத்தை மேன்முறையீட்டு நீதிமன்றம் ரத்து செய்ததுடன், அவருக்குச் சேர வேண்டிய ஓய்வூதியத்தை உடனடியாக வழங்க நடவடிக்கை எடுக்குமாறு ஓய்வூதிய பணிப்பாளர் நாயகத்திற்கு ரிட் ஆணை பிறப்பித்தது.