'தித்வா' சூறாவளி காரணமாகப் பாதிக்கப்பட்ட பாடசாலைகளுக்காக எனக்கூறி, மக்களிடமிருந்து பணத்தையும் உதவிகளையும் திரட்டும் ஒரு திட்டமிட்ட மோசடி குறித்து மின்சக்தி அமைச்சு பொதுமக்களுக்கு விசேட எச்சரிக்கை விடுத்துள்ளது. சம்பந்தப்பட்ட மோசடிச் செயலுக்காக, மின்சக்தி அமைச்சர் பொறியியலாளர் குமார ஜயக்கொடி அவர்களின் புகைப்படத்தைப் பயன்படுத்தி போலியாக உருவாக்கப்பட்ட வாட்ஸ்அப் (WhatsApp) கணக்கு ஒன்றின் மூலம் இந்த மோசடி வணிகம் நடைபெறுவதாக அமைச்சுக்குத் தகவல் கிடைத்துள்ளது.
இது தொடர்பாக இலங்கை பொலிஸாரிடம் ஏற்கனவே உத்தியோகபூர்வமாக முறைப்பாடு செய்யப்பட்டுள்ளதாக அமைச்சரின் ஊடகச் செயலாளர் ஷான் மொஹமட் வெளியிட்ட ஊடக அறிக்கையில் தெரிவிக்கப்பட்டுள்ளது. தித்வா சூறாவளி தொடர்பாகவும் அல்லது வேறு எந்தக் காரணத்திற்காகவும் அமைச்சர் எந்தச் சந்தர்ப்பத்திலும் பொதுமக்களிடம் நிதி அல்லது வேறு எந்த வகையான உதவியையும் கோரவில்லை என்பதை அந்த அறிக்கை கடுமையாக வலியுறுத்தியுள்ளது.
ஆகவே, அமைச்சரின் பெயர் அல்லது புகைப்படத்தைப் பயன்படுத்தி வரும் இவ்வாறான மோசடித் தொலைபேசி அழைப்புகள் அல்லது வேறு எந்தப் போலிப் பிரச்சாரங்களுக்கும் ஆளாக வேண்டாம் என்றும், அத்தகைய மோசடிக்காரர்களுக்குப் பணம் கொடுப்பதைத் தவிர்க்குமாறும் மின்சக்தி அமைச்சு பொதுமக்களை மேலும் கேட்டுக்கொள்கிறது.