பிரபாத் சந்திரகீர்த்தி ஜனாதிபதி பணிக்குழாம் தலைவராக நியமிக்கப்பட்டுள்ளார். அதற்கான நியமனக் கடிதம் ஜனாதிபதி செயலாளர் கலாநிதி நந்திக சனத் குமாரநாயக்கவினால் இன்று (16) முற்பகல் ஜனாதிபதி அலுவலகத்தில் அவரிடம் கையளிக்கப்பட்டது.
இலங்கை நிர்வாக சேவையின் விசேட தர அதிகாரியான பிரபாத் சந்திரகீர்த்தி தற்போது 26 வருடங்களாக அரச சேவையில் கடமையாற்றி வருகின்றார். 2000 ஆம் ஆண்டு பெப்ரவரி மாதம் 15 ஆம் திகதி இலங்கை நிர்வாக சேவையில் இணைந்த சந்திரகீர்த்தி, 2010 ஆம் ஆண்டில் இலங்கை நிர்வாக சேவையின் I ஆம் தரத்திற்கு பதவி உயர்வு பெற்றார் அத்துடன் 2019 ஆம் ஆண்டில் விசேட தரத்திற்கு பதவி உயர்வு பெற்றார். 2001 ஆம் ஆண்டில் ஊவா மாகாண சபையின் கல்வி மற்றும் சுற்றுலா அமைச்சின் உதவிச் செயலாளராக தனது முதல் நியமனத்தைப் பெற்ற அவர், 2003 ஆம் ஆண்டில் பியகம உதவி பிரதேச செயலாளராக கடமைகளை பொறுப்பேற்றார்.அதன் பின்னர், 2006 ஆம் ஆண்டில் இலங்கை பாராளுமன்ற சபை முதல்வர் அலுவலகத்தின் உதவிச் செயலாளராக நியமிக்கப்பட்டார் அத்துடன் 2010 ஆம் ஆண்டில் அதன் சிரேஷ்ட உதவிச் செயலாளராக பதவி உயர்வு பெற்று 2015 ஆம் ஆண்டு வரை அப்பதவியில் பணியாற்றினார். பின்னர், 2015 ஏப்ரல் முதல் 2020 அக்டோபர் வரை கடலோரப் பாதுகாப்புத் திணைக்களத்தின் பணிப்பாளர் நாயகமாகப் பணியாற்றிய அவர், 2020 அக்டோபர் முதல் 2023 டிசம்பர் வரை தொழிலாளர் ஆணையாளர் நாயகமாகவும் பணியாற்றினார். 2024 ஜனவரி மாதம் சுற்றாடல், வனவிலங்கு, வன வளங்கள், நீர் வழங்கல், பெருந்தோட்ட மற்றும் சமூக உட்கட்டமைப்பு அமைச்சின் செயலாளராக நியமிக்கப்பட்ட சந்திரகீர்த்தி, 2024 நவம்பர் முதல் இன்று வரை பெருந்தோட்ட மற்றும் சமூக உட்கட்டமைப்பு அமைச்சின் செயலாளராகவும் கடமையாற்றினார் அத்துடன் தற்போது அத்தியாவசிய சேவைகள் ஆணையாளர் நாயகமாகவும் கடமையாற்றுகிறார்.
