நுகேகொட நீதவான் நீதிமன்றத்தில் நடைபெற்ற வழக்கு நடவடிக்கைகளுக்காக ஆஜரான இரண்டு சட்டத்தரணிகளுக்கு மரண அச்சுறுத்தல் விடுத்து, அவர்கள் பயணித்த மோட்டார் வாகனத்தை தாக்கி சேதப்படுத்திய சம்பவத்துடன் தொடர்புடைய சந்தேகநபர் ஒருவரை மிரிஹான பொலிஸார் கைது செய்துள்ளனர். மிரிஹான பொலிஸ் உத்தியோகத்தர்கள் குழுவொன்று இன்று (01) அதிகாலை மாதம்பே, கஜுலந்தவத்த பிரதேசத்தில் வைத்து இந்த சந்தேகநபரை கைது செய்துள்ளதாக பொலிஸ் ஊடகப் பிரிவு தெரிவித்துள்ளது.கடந்த ஜனவரி 30ஆம் திகதி, சம்பந்தப்பட்ட சட்டத்தரணிகள் நீதிமன்ற நடவடிக்கைகளை முடித்து வெளியேறிக் கொண்டிருந்தபோது, நுகேகொட கம்சபா சந்திக்கு அருகில் ஒரு குழுவினர் வீதியை மறித்து இந்த குற்றத்தைச் செய்ததாக மிரிஹான பொலிஸாருக்கு முறைப்பாடு கிடைத்திருந்தது. அப்போது, அந்தக் குழுவினர் சட்டத்தரணிகள் பயணித்த மோட்டார் வாகனத்தைச் சுற்றி வளைத்து, அவர்களுக்கு மரண அச்சுறுத்தல் விடுத்து, வாகனத்தைத் தாக்கி குற்றவியல் அச்சுறுத்தலையும் சேதத்தையும் ஏற்படுத்தியதாக பொலிஸார் தெரிவித்தனர். இந்த சம்பவம் பதிவானதும், மிரிஹான பொலிஸார் உட்பட மூன்று பொலிஸ் குழுக்கள் விசாரணைகளுக்காக ஈடுபடுத்தப்பட்டன. விசாரணைகளின் விளைவாக, மாதம்பே பிரதேசத்தைச் சேர்ந்த 43 வயதுடைய இந்த சந்தேகநபர் கைது செய்யப்பட்டுள்ளார். வீதியை மறித்தல், குற்றவியல் அச்சுறுத்தல், சேதம் விளைவித்தல் மற்றும் சட்டவிரோத மக்கள் கூட்டத்தின் உறுப்பினராக இருத்தல் ஆகிய குற்றச்சாட்டுகளின் கீழ் அவர் கைது செய்யப்பட்டுள்ளார். கைது செய்யப்பட்ட சந்தேகநபர் அடையாள அணிவகுப்புக்காக இன்று (01) நுகேகொட நீதவான் நீதிமன்றத்தில் ஆஜர்படுத்தப்படவுள்ளதாக பொலிஸார் தெரிவித்தனர். சட்டத்தரணிகளின் சட்டபூர்வமான கடமைகளுக்கு இடையூறு விளைவித்து இந்த குற்றத்துடன் தொடர்புடைய மேலும் பல சந்தேகநபர்கள் இருப்பதால், அவர்கள் அனைவரையும் உடனடியாக கைது செய்து நீதிமன்றத்தில் ஆஜர்படுத்துவதற்காக மிரிஹான பொலிஸார் உட்பட மூன்று பொலிஸ் குழுக்கள் மேலதிக விரிவான விசாரணைகளை மேற்கொண்டு வருகின்றன.