தாய்நாடு பத்திரிகை மூடப்பட்டதன் காரணமாக ஊடகவியலாளர்களுக்கும் அதன் ஊழியர்களுக்கும் ஏற்படும் அநீதி தொடர்பில் அரசாங்கத்தின் செய்திப் பணிப்பாளர் நாயகம் தலையிட்டுள்ளதாக வெகுசன ஊடக பிரதி அமைச்சர் சட்டத்தரணி கௌசல்யா ஆரியரத்ன நேற்று (05) பாராளுமன்றத்தில் தெரிவித்தார். இந்த பிரச்சினைக்கு வெற்றிகரமான தீர்வு காண்பதற்காக தொழிலாளர் அமைச்சின் ஆலோசனையைப் பெற செய்திப் பணிப்பாளர் நாயகம் நடவடிக்கை எடுத்து வருவதாகவும் பிரதி அமைச்சர் இங்கு குறிப்பிட்டார்.
சர்வதேச மகளிர் தினத்தை முன்னிட்டு பாராளுமன்றத்தில் நடைபெற்ற ஒத்திவைப்பு விவாதத்தின் போது அவர் இந்த கருத்துக்களை வெளியிட்டார்.
தாய்நாடு பத்திரிகை மூடப்படவுள்ளது என்ற தகவல் கிடைத்தவுடன், அதன் மூலம் சுமார் ஐம்பது பேருக்கு வேலை இழக்கும் அபாயம் ஏற்பட்டுள்ளதாக பிரதி அமைச்சர் சுட்டிக்காட்டினார். மேலும், சம்பந்தப்பட்ட நிறுவனத்தின் ஊழியர்களுக்கு சம்பளம் மற்றும் ஊழியர் சேமலாப நிதி செலுத்தப்படவில்லை என அறிவிக்கப்பட்டுள்ளதாகவும், வெகுசன ஊடகவியலாளர்களுக்கு உரிய முறையில் சம்பளம் வழங்கப்பட வேண்டும் என கடந்த சில நாட்களாக தானும் பாராளுமன்றத்தில் வலியுறுத்தியதாக அவர் நினைவுபடுத்தினார்.
ஒரு அரசாங்கமாக ஊடகவியலாளர்களின் பாதுகாப்பை உறுதிப்படுத்த நடவடிக்கை எடுக்கப்படும் என்றும், ஊடகத் துறையை ஒரு நிலையான தொழிலாகப் பேண வேண்டும் என்றும் அமைச்சர் வலியுறுத்தினார்.