கோவிட் தொற்றுநோய் நிலவிய 2020 ஆம் ஆண்டில் காணாமல் போனதாகக் கூறப்படும் அறுபத்திரண்டு வயது தம்பதியரின் கொலை தொடர்பான தகவல்களை ஆறு ஆண்டுகளுக்குப் பிறகு பொலிஸார் வெளிப்படுத்தியுள்ளனர். கிராண்ட்பாஸ் பொலிஸ் பிரிவுக்குட்பட்ட வெல்லம்பிட்டிய, கம்பிக்கொட்டுவ வத்த பிரதேசத்தில் வசித்து வந்த சுனில் குமாரசிங்க மற்றும் கார்மன் டி சில்வா ஆகிய தம்பதியரின் சடலப் பாகங்கள் அதே பிரதேசத்தில் உள்ள ஒரு கால்வாயில் புதைக்கப்பட்டிருந்த நிலையில் இவ்வாறு கண்டுபிடிக்கப்பட்டன.
இந்த தம்பதியினர் காணாமல் போனது குறித்து அவர்களது உறவினர்கள் முதலில் கிராண்ட்பாஸ் பொலிஸில் முறைப்பாடு செய்திருந்த போதிலும், சரியான தகவல் எதுவும் வெளியாகவில்லை. அதன் பின்னர் குடும்ப உறவினர்கள் ஜனாதிபதி செயலகத்திற்கு அறிவித்ததையடுத்து, இந்த சம்பவம் தொடர்பான மேலதிக விசாரணைகள் கொழும்பு குற்றப் பிரிவிடம் ஒப்படைக்கப்பட்டுள்ளன. அதன்படி, கொழும்பு குற்றப் பிரிவின் பணிப்பாளர், சிரேஷ்ட பொலிஸ் அத்தியட்சகர் இந்திக்க லொக்குஹெட்டி அவர்களின் மேற்பார்வையின் கீழ், பிரதான பொலிஸ் பரிசோதகர் எஸ்.பி. விஜேதுங்க உள்ளிட்ட குழுவினர் இந்த விசாரணைகளை ஆரம்பித்துள்ளனர்.
இந்த விசாரணைகளின் போது, காணாமல் போன தம்பதியரின் வீட்டிற்கு அருகிலேயே வசித்து வந்த மற்றொரு தம்பதியினரிடம் மேற்கொள்ளப்பட்ட நீண்ட விசாரணைகளின் மூலம் இந்த கொடூர குற்றத்தின் தகவல்கள் வெளிவந்துள்ளன. தனிப்பட்ட தகராறு முற்றியதால் கூரிய ஆயுதங்களால் தாக்கி இந்த தம்பதியினர் கொலை செய்யப்பட்டுள்ளதாகவும், பின்னர் கொலை செய்யப்பட்ட பெண்ணின் கழுத்தில் இருந்த தங்கச் சங்கிலியையும் கொள்ளையடித்து சடலங்களை துண்டு துண்டாக வெட்டி அருகிலுள்ள கால்வாயில் புதைத்ததாகவும் பொலிஸ் விசாரணைகளில் சந்தேகநபர்கள் ஒப்புக்கொண்டுள்ளனர். புதைக்கப்பட்ட சடலப் பாகங்கள் காலப்போக்கில் பல்வேறு சந்தர்ப்பங்களில் நீர்மட்டத்திற்கு வந்தபோது, பிரதான சந்தேகநபர் அவற்றை மீண்டும் மீண்டும் அதே இடத்தில் புதைத்து மறைத்ததும் விசாரணைகளில் மேலும் தெரியவந்துள்ளது.
இந்தக் குற்றம் தொடர்பாக சம்பந்தப்பட்ட அண்டை வீட்டுத் தம்பதியினரும், அதற்கு உடந்தையாக இருந்த மற்றொருவரும் ஏற்கனவே பொலிஸாரால் கைது செய்யப்பட்டுள்ளனர். கைது செய்யப்பட்ட ஆண் சந்தேகநபர்கள் இருவரும் போதைப்பொருளுக்கு கடுமையாக அடிமையானவர்கள் என பொலிஸார் உறுதிப்படுத்தியுள்ளனர். கைது செய்யப்பட்ட சந்தேகநபர்கள் குற்றம் நடந்த இடத்திற்கு அழைத்துச் செல்லப்பட்டு, சம்பவ இட ஆய்வு நடத்தப்பட்ட பின்னர், புதுக்கடை நீதவான் நீதிமன்றத்திற்கு அறிக்கை சமர்ப்பிக்கப்பட்டு, சம்பந்தப்பட்ட சடலப் பாகங்கள் மீட்கப்பட்டுள்ளன. இந்த கொலைச் சம்பவம் தொடர்பான மேலும் ஒரு சந்தேகநபரை கைது செய்வதற்காக பொலிஸார் தற்போது மேலதிக விசாரணைகளை மேற்கொண்டு வருகின்றனர்.
