ஸ்ரீலங்கன் ஏர்லைன்ஸ் நிறுவனத்தின் முன்னாள் தலைமை நிர்வாக அதிகாரி கபில சந்திரசேன, ஏர்பஸ் ஒப்பந்தம் மூலம் லஞ்சமாகப் பெற்ற பணத்தை முன்னாள் ஜனாதிபதி மஹிந்த ராஜபக்ஷ மற்றும் முன்னாள் சிவில் விமானப் போக்குவரத்து அமைச்சர் பியங்கர ஜயரத்ன ஆகியோருக்கு வழங்கியுள்ளார் என லஞ்சம் அல்லது ஊழல் குற்றச்சாட்டுகள் விசாரணை ஆணைக்குழு இன்று (19) கொழும்பு நீதவான் நீதிமன்றத்தில் வெளிப்படுத்தியது. இந்தச் சம்பவம் தொடர்பாகக் கைதுசெய்யப்பட்ட கபில சந்திரசேனவை இன்று சிறைச்சாலை அதிகாரிகள் நீதிமன்றத்தில் ஆஜர்படுத்திய பின்னர், கொழும்பு பிரதான நீதவான் அசங்க எஸ்.
போதரகம், சந்தேகநபரை அடுத்த மாதம் 2ஆம் திகதி வரை மேலும் விளக்கமறியலில் வைக்க உத்தரவிட்டார்.ஸ்ரீலங்கன் ஏர்லைன்ஸ் நிறுவனத்தின் தலைமை நிர்வாக அதிகாரியாகவும், ஏர்பஸ் விமானக் கொள்முதல் குழுவின் தலைவராகவும் இருந்த காலத்தில் இந்த நிதி முறைகேடு நடந்ததாக விசாரணை அதிகாரிகள் நீதிமன்றத்தில் தெரிவித்தனர். சந்தேகநபர் தனது மனைவி மற்றும் சிலருடன் சதி செய்து, லஞ்சப் பணத்தைப் பெறும் நோக்கில் தனது மனைவியின் பெயரில் புருணையில் ஒரு போலி நிறுவனத்தை நிறுவி, அதனுடன் தொடர்புடைய சிங்கப்பூர் வங்கிக் கணக்கைத் திறந்து பணத்தைப் பெற்றுள்ளதாக நீதிமன்றத்தில் சமர்ப்பிக்கப்பட்ட மேலதிக 'பி' அறிக்கையில் குறிப்பிடப்பட்டுள்ளது.
சந்தேகநபர் அளித்த வாக்குமூலங்களின்படி, அவர் இந்த ஒப்பந்தம் மூலம் சம்பாதித்த எண்பது மில்லியன் ரூபாய் பணத்தை இரண்டு முக்கிய பிரமுகர்களுக்குப் பிரித்துக் கொடுத்துள்ளார். அதன்படி, 2015ஆம் ஆண்டு முன்னாள் ஜனாதிபதி மஹிந்த ராஜபக்ஷவின் கோரிக்கையின் பேரில், தலா இருபது மில்லியன் ரூபாய் வீதம் மூன்று சந்தர்ப்பங்களில் அறுபது மில்லியன் ரூபாய் பெலியத்த மற்றும் காலிட்டன் இல்லங்களில் அவருக்கு வழங்கப்பட்டதாகத் தெரியவந்துள்ளது. அத்துடன், மீதமுள்ள இருபது மில்லியன் ரூபாய் முன்னாள் அமைச்சர் பியங்கர ஜயரத்னவுக்கு வழங்கப்பட்டுள்ளதாகவும், அந்த லஞ்சப் பணத்தின் ஒரு பகுதி ஸ்ரீலங்கன் ஏர்லைன்ஸ் நிறுவனத்தின் முன்னாள் பணிப்பாளர் சமிந்திர ராஜபக்ஷவின் கணக்கிலும் வரவு வைக்கப்பட்டுள்ளதாகவும் லஞ்ச ஆணைக்குழு மேலும் சுட்டிக்காட்டியது.
இந்தச் சம்பவம் தொடர்பாகப் பெயரிடப்பட்டுள்ள பிரியங்கா நியோமாலி விஜேரத்ன மற்றும் சமிந்திர ராஜபக்ஷ ஆகியோருக்கு எதிராகப் பிடியாணை பிறப்பிக்குமாறு விசாரணை அதிகாரிகள் நீதிமன்றத்தில் கோரினர். அந்தக் கோரிக்கை தொடர்பான சாட்சியங்களை விசாரிப்பதற்காக வழக்கு அடுத்த மார்ச் 24ஆம் திகதிக்கு ஒத்திவைக்க நீதவான் உத்தரவிட்டார். மேலும், சந்தேகநபரின் வாக்குமூலத்தில் குறிப்பிடப்பட்டுள்ள அனைத்து நபர்கள் குறித்தும் விரிவான விசாரணை நடத்துமாறு பிரதான நீதவான் லஞ்ச ஆணைக்குழுவுக்கு மேலும் அறிவித்தார்.