கொழும்பு, புதுக்கடை நீதவான் நீதிமன்றத்தில் பாதாள உலகத் தலைவன் கணேமுல்ல சஞ்சீவவைக் கொலை செய்ய முயற்சித்த சம்பவம் தொடர்பில், பயங்கரவாதத் தடைச் சட்டத்தின் கீழ் சுமார் ஐந்து மாதங்களாக கொழும்பு குற்றப் பிரிவில் தடுத்து வைக்கப்பட்டுள்ள இஷாரா செவ்வந்தி என்ற சந்தேகநபரின் பிறந்தநாளைக் கொண்டாட எடுக்கப்பட்ட முயற்சி குறித்து தற்போது விசேட பொலிஸ் விசாரணை ஆரம்பிக்கப்பட்டுள்ளது.
கடந்த 29ஆம் திகதி அவரது 27வது பிறந்தநாளை முன்னிட்டு கொழும்பு குற்றப் பிரிவுக்குள் கேக் வெட்டி கொண்டாடுவதற்கு அனைத்து ஏற்பாடுகளும் செய்யப்பட்டிருந்தன. பாதுகாப்பு காரணங்களுக்காக சந்தேகநபர்களுக்கு வெளியிலிருந்து உணவு மற்றும் பானங்கள் கொண்டு வருவது தடைசெய்யப்பட்டுள்ள நிலையில், அவரது சகோதரரும் ஒரு உறவுக்காரப் பெண்ணும் இந்தக் கேக்கைக் கொண்டு வந்துள்ளனர். எவ்வாறாயினும், இது குறித்து முன்கூட்டியே கிடைத்த தகவலின் அடிப்படையில், கொழும்பு மாவட்டப் பொறுப்பு பிரதிப் பொலிஸ் மா அதிபர் நிஷாந்த டி சொய்சா மற்றும் கொழும்பு மத்திய பிரிவின் பொறுப்பு சிரேஷ்ட பொலிஸ் அத்தியட்சகர் மகேஷ் குமாரசிங்க ஆகியோர் அடங்கிய குழுவினர், எந்தவித முன் அறிவிப்பும் இன்றி அந்த இடத்திற்குச் சென்று கேக்கைப் பொலிஸ் பொறுப்பில் எடுத்து, இந்த கொண்டாட்டத்தைத் தடுத்துள்ளனர்.
இந்தச் சம்பவம் தொடர்பில் கொழும்பு குற்றப் பிரிவில் பிரதான பொலிஸ் பரிசோதகராகப் பணிபுரியும் நிலையப் பொறுப்பதிகாரியைப் பணி இடைநீக்கம் செய்து, அவருக்கு எதிராக விரைவான ஒழுங்குப் பரிசோதனை நடத்துமாறு கோரி பிரதிப் பொலிஸ் மா அதிபர் பொலிஸ் தலைமையகத்திற்குப் பரிந்துரைகளைச் சமர்ப்பித்துள்ளார். பதில் பொலிஸ் மா அதிபர் சஞ்சீவ தர்மரத்ன மற்றும் மேல் மாகாணப் பொறுப்பு சிரேஷ்ட பிரதிப் பொலிஸ் மா அதிபர் சஞ்சீவ மேதவத்த ஆகியோரின் அறிவுறுத்தலின் பேரில், சம்பந்தப்பட்ட பொறுப்புள்ள அதிகாரிகளுக்கு எதிராக தற்போது விசேட விசாரணைப் பிரிவு ஊடாக விசாரணைகள் ஆரம்பிக்கப்பட்டுள்ளதாக பொலிஸ் ஊடகப் பேச்சாளர் உறுதிப்படுத்தினார்.
சட்டத்தரணி வேடத்தில் நீதிமன்றத்திற்கு துப்பாக்கியை எடுத்துச் சென்ற சம்பவத்திற்குப் பிறகு இந்தியாவுக்கும் பின்னர் நேபாளத்திற்கும் தப்பிச் சென்றிருந்த நிலையில், கடந்த ஆண்டு அக்டோபர் 15ஆம் திகதி உதவிப் பொலிஸ் அத்தியட்சகர் ரோஹான் ஒலுகல உள்ளிட்ட விசேட பொலிஸ் குழுவினால் இந்த சந்தேகநபர் நாட்டிற்கு அழைத்து வரப்பட்டார். அவரது பிறந்தநாளுக்கு கேக் கொண்டு வந்த சகோதரரும் இதற்கு முன்னர் இந்தக் கொலை முயற்சிக்கு உதவிய குற்றச்சாட்டில் விளக்கமறியலில் வைக்கப்பட்டு பிணையில் விடுவிக்கப்பட்டவர். அதேபோன்று, அதே குற்றச்சாட்டில் விளக்கமறியலில் வைக்கப்பட்டிருந்த அவரது தாய், புற்றுநோய் நிலைமை தீவிரமடைந்ததால் வைத்தியசாலையில் சிகிச்சை பெற்று வந்த நிலையில் உயிரிழந்திருந்தார்.
கொழும்பு குற்றப் பிரிவில் இவ்வாறான சம்பவங்கள் பதிவானது அண்மைக் காலத்தில் இது முதல் தடவையல்ல. இஷாரா செவ்வந்தியுடன் நேபாளத்திலிருந்து அழைத்து வரப்பட்ட, தோற்றத்தில் அவரை ஒத்திருந்த “டூப்ளிகேட் இஷாரா” என்று அழைக்கப்பட்ட யாழ்ப்பாணத்தைச் சேர்ந்த ஒரு இளம் பெண்ணுடன் தொடர்பு வைத்துக்கொண்டு அவருக்கு உணவு வழங்கச் சென்ற ஒரு பொலிஸ் அதிகாரியைப் பணி இடைநீக்கம் செய்யவும் அண்மையில் நடவடிக்கை எடுக்கப்பட்டது. அத்துடன், 2019ஆம் ஆண்டு துபாயிலிருந்து நாடு கடத்தப்பட்டு நாட்டிற்கு அழைத்து வரப்பட்ட சக்திவாய்ந்த போதைப்பொருள் கடத்தல்காரரான கஞ்சிபானி இம்ரானின் பிறந்தநாளை முன்னிட்டும் கொழும்பு குற்றப் பிரிவில் கேக் வெட்டி கொண்டாடப்பட்டமை பொலிஸ் வட்டாரத்தில் ஒரு பகிரங்க இரகசியமாகும்.