சிறு வயதில் சமூக ஊடகங்களுக்கு அடிமையாதல் காரணமாக தனது மனநலத்திற்கு ஏற்பட்ட பாதிப்பு தொடர்பாக மெட்டா (Meta) மற்றும் யூடியூப் (YouTube) நிறுவனங்களுக்கு எதிராக வழக்குத் தொடர்ந்த ஒரு இளம் பெண்ணுக்கு 6 மில்லியன் அமெரிக்க டாலர் நஷ்டஈடு வழங்க வேண்டும் என லாஸ் ஏஞ்சல்ஸ் நடுவர் மன்றம் ஒரு வரலாற்றுச் சிறப்புமிக்க தீர்ப்பை வழங்கியுள்ளது. ஃபேஸ்புக், இன்ஸ்டாகிராம் மற்றும் வாட்ஸ்அப் ஆகியவற்றைச் சொந்தமான மெட்டா நிறுவனமும், யூடியூப்பைச் சொந்தமான கூகிள் நிறுவனமும் வேண்டுமென்றே அடிமையாக்கும் தளங்களை உருவாக்கி, 20 வயதான கேலி (Kaley) என்ற இந்த இளம் பெண்ணின் மனநலத்திற்கு கடுமையான பாதிப்பை ஏற்படுத்தியுள்ளதாக நடுவர் மன்றம் முடிவு செய்துள்ளது.
இந்த நிறுவனங்கள் தீங்கிழைக்கும் விதமாகவும், துன்புறுத்தும் விதமாகவும், மோசடியாகவும் செயல்பட்டுள்ளதாகத் தீர்மானித்த நடுவர் மன்றம், அவருக்கு இழப்பீடாக 3 மில்லியன் டாலர்களும், தண்டனை இழப்பீடாக மேலும் 3 மில்லியன் டாலர்களும் செலுத்த வேண்டும் என உத்தரவிட்டுள்ளதுடன், இதில் 70% பொறுப்பை மெட்டா நிறுவனமும், மீதமுள்ள 30% பொறுப்பை கூகிள் நிறுவனமும் ஏற்க வேண்டும்.கேலியின் வழக்கறிஞர்கள் நீதிமன்றத்தில் சுட்டிக்காட்டியது என்னவென்றால், இந்த நிறுவனங்கள் இளம் பயனர்களை நீண்ட காலம் தக்கவைத்துக்கொள்ளும் நோக்கில் தங்கள் தளங்களை 'அடிமையாக்கும் இயந்திரங்களாக' (addiction machines) கட்டமைத்துள்ளன என்றும், இன்ஸ்டாகிராமில் உள்ள 'infinite scroll' போன்ற அம்சங்கள் அதற்காகவே வடிவமைக்கப்பட்டுள்ளன என்றும் ஆகும். கேலி தனது சாட்சியத்தில் குறிப்பிட்டதாவது, தான் 6 வயதில் யூடியூப்பையும், 9 வயதில் இன்ஸ்டாகிராமையும் பயன்படுத்தத் தொடங்கியதாகவும், அப்போது வயது காரணமாக எந்தத் தடையும் ஏற்படவில்லை என்றும் ஆகும். அவர் சமூக ஊடகங்களுக்காக முழு நேரத்தையும் செலவிட்டதால் குடும்பத்தினருடனான தொடர்புகளையும் கூட நிறுத்திவிட்டார், மேலும், 10 வயதிலிருந்தே பதட்டம் மற்றும் மனச்சோர்வு போன்ற நிலைகளால் பாதிக்கப்படத் தொடங்கினார். அத்துடன், சிறு வயதிலிருந்தே இன்ஸ்டாகிராம் ஃபில்டர்களை (filters) பயன்படுத்தி தனது வெளித்தோற்றத்தை மாற்றிக்கொள்ள முயன்ற அவர், தற்போது தனது உடல் தோற்றம் குறித்து அதிக கவலையடையும் 'body dysmorphia' என்ற நிலைக்கும் ஆளாகியுள்ளார்.
இந்தத் தீர்ப்பு குறித்து தாங்கள் உடன்படவில்லை என்றும், இதற்கு எதிராக மேன்முறையீடு செய்யப்போவதாகவும் மெட்டா மற்றும் கூகிள் நிறுவனங்கள் தனித்தனியாக அறிவித்துள்ளன. இளம் வயதினரின் மனநலம் மிகவும் சிக்கலானது என்பதால், அதை ஒரு பயன்பாட்டுடன் மட்டும் தொடர்புபடுத்த முடியாது என்று கூறி, மெட்டா நிறுவனம் தனது பாதுகாப்பு அறிக்கைகள் மீது நம்பிக்கை தெரிவித்துள்ளதுடன், கூகிள் நிறுவனம் யூடியூப் ஒரு பொறுப்புடன் உருவாக்கப்பட்ட வீடியோ பார்க்கும் தளம் அன்றி சமூக ஊடக வலைப்பின்னல் அல்ல என்று சுட்டிக்காட்டுகிறது. வழக்கு விசாரணையின் போது சாட்சியமளித்த மெட்டா தலைவர் மார்க் சக்கர்பெர்க், தனது நிறுவனம் 13 வயதுக்குட்பட்ட குழந்தைகள் தளங்களை அணுகுவதைத் தடுக்கும் கொள்கையைப் பின்பற்றுவதாகக் கூறினாலும், சிறு குழந்தைகள் அதைப் பயன்படுத்துகிறார்கள் என்பதை நிறுவனம் அறிந்திருந்தது என்பதற்கான உள் ஆவணங்கள் மூலம் உறுதிப்படுத்தப்பட்டது. அத்துடன், கேலி ஒரு நாளைக்கு 16 மணிநேரம் இன்ஸ்டாகிராம் பயன்படுத்தினார் என்ற கூற்றை அடிமையாதல் என்று ஏற்றுக்கொள்வதை இன்ஸ்டாகிராம் தலைவர் ஆடம் மொசெரி மறுத்து, அதை ஒரு இளைஞரின் 'பிரச்சனைக்குரிய' நடத்தை என்று மட்டுமே குறிப்பிட்டார்.
இந்த வழக்கில் ஆரம்பத்தில் பிரதிவாதிகளாகப் பெயரிடப்பட்ட Snap மற்றும் TikTok நிறுவனங்கள் வழக்கு விசாரணைக்கு முன்னரே கேலியுடன் இரகசிய சமரசத்திற்கு வந்திருந்தன. இந்த வெற்றி அறிவிக்கப்பட்டவுடன், நீதிமன்றத்திற்கு வெளியே இருந்த மற்ற பெற்றோர்களும் ஆதரவாளர்களும் மிகுந்த மகிழ்ச்சியை வெளிப்படுத்தினர், மேலும் அமெரிக்க நீதிமன்றங்களில் விசாரணையில் உள்ள இது போன்ற நூற்றுக்கணக்கான வழக்குகளுக்கு இது ஒரு மிகப்பெரிய முன்னுதாரணமாக அமையும் என்று எதிர்பார்க்கப்படுகிறது. குழந்தைகளுக்கு பாலியல் துஷ்பிரயோகம் செய்பவர்களிடமிருந்தும், பொருத்தமற்ற உள்ளடக்கங்களிலிருந்தும் பாதுகாக்கத் தவறியது தொடர்பாக நியூ மெக்ஸிகோ நடுவர் மன்றம் மெட்டா நிறுவனத்திற்கு எதிராகத் தீர்ப்பளித்த ஒரு நாளுக்குப் பிறகு இந்த லாஸ் ஏஞ்சல்ஸ் தீர்ப்பு அறிவிக்கப்பட்டது. தற்போது ஆஸ்திரேலியா மற்றும் ஐக்கிய இராச்சியம் போன்ற நாடுகளும் 16 வயதுக்குட்பட்ட குழந்தைகளின் சமூக ஊடகப் பயன்பாட்டைக் கட்டுப்படுத்த அல்லது தடை செய்ய நடவடிக்கை எடுத்து வரும் நிலையில், பொதுமக்களுக்கும் சமூக ஊடக நிறுவனங்களுக்கும் இடையிலான மோதல் உச்சக்கட்டத்தை எட்டியுள்ளதாக ஃபோரெஸ்டரின் ஆராய்ச்சி இயக்குனர் மைக் ப்ரோல்க்ஸ் சுட்டிக்காட்டுகிறார். இதற்கிடையில், கலிபோர்னியா ஃபெடரல் நீதிமன்றத்திலும் மெட்டா உள்ளிட்ட சமூக ஊடக நிறுவனங்களுக்கு எதிராக இதேபோன்ற மற்றொரு வழக்கு வரும் ஜூன் மாதம் விசாரணைக்கு வரவுள்ளது.
