கட்டுநாயக்க விமான நிலையத்தில் போதைப்பொருளுடன் பிக்குகள் குழுவொன்று கைது செய்யப்பட்ட சம்பவம் மற்றும் அது தொடர்பான நிலைமை குறித்து கலந்துரையாடுவதற்காக ஜனாதிபதி அநுர குமார திசாநாயக்கவுக்கும், முத்தெளிக மகா சங்கத்தினருக்கும் இடையில் இன்று (28) பிற்பகல் ஜனாதிபதி அலுவலகத்தில் விசேட சந்திப்பு நடைபெற்றது. இச்சம்பவம் தொடர்பான விசாரணைகள் மற்றும் அதன் பின்னர் சமூகத்தில் உருவாகியுள்ள விவாதம் குறித்தும் இங்கு விசேட கவனம் செலுத்தப்பட்டது.
இச்சந்தர்ப்பத்தில் கலந்துகொண்ட ஜனாதிபதி, தற்போது போதைப்பொருள் அச்சுறுத்தல் முழு நாட்டையும் பாதிக்கும் ஒரு தேசிய பேரழிவாக மாறியுள்ளது என்று சுட்டிக்காட்டினார். எனவே, இந்த நெருக்கடியைக் கட்டுப்படுத்த அரசாங்கத்தால் செயல்படுத்தப்படும் திட்டத்திற்கு அனைவரின் வலுவான பங்களிப்பும் ஆதரவும் அவசியம் என்று அவர் வலியுறுத்தினார். மேலும், நாட்டின் பொருளாதாரம் மற்றும் சமூக அமைப்பை ஒரு புதிய திசையில் கொண்டு செல்லும் அதே வேளையில், புத்த சாசனத்தையும் அதனுடன் தொடர்புடைய உயர் விழுமியங்களையும் பாதுகாப்பது தற்போதைய அரசாங்கத்தின் முக்கிய நோக்கங்களில் ஒன்றாகும் என்றும் ஜனாதிபதி மேலும் தெரிவித்தார்.
கைது செய்யப்பட்ட சம்பவம் குறித்து பொலிஸ்மா அதிபர் மகா சங்கத்தினருக்கு இங்கு விளக்கமளித்தார். அதற்கு பதிலளித்த மகாநாயக்க தேரர்கள், இந்த பிரச்சினை தொடர்பாக ஏற்கனவே ஒரு அறிக்கை வெளியிடப்பட்டுள்ளது என்றும், அது முழு சங்க சமூகத்தின் பொதுவான கருத்தாக கருதப்பட வேண்டும் என்றும் குறிப்பிட்டனர். மேலும், சங்க சமூகத்தின் கௌரவத்தையும் பாதுகாப்பையும் உறுதிப்படுத்துவது பிக்குகளால் மட்டும் தனியாக செய்யக்கூடிய காரியம் அல்ல என்பதால், அதற்கு அரசாங்கத்தின் தலையீடும் ஆதரவும் கட்டாயம் கிடைக்க வேண்டும் என்றும் அவர்கள் இங்கு சுட்டிக்காட்டினர்.
புத்த சாசனத்தின் எதிர்கால பாதுகாப்பிற்காக எடுக்கப்பட வேண்டிய அடுத்தகட்ட நடவடிக்கைகள் மற்றும் விகாரைகள் மற்றும் தேவாலயங்கள் சட்டம் உள்ளிட்ட தொடர்புடைய சட்டங்களில் செய்யப்பட வேண்டிய காலோசிதமான திருத்தங்கள் குறித்தும் இச்சந்திப்பில் விரிவாக கலந்துரையாடப்பட்டது. இந்த விசேட கலந்துரையாடலில் முத்தெளிக மகாநாயக்க மற்றும் அநுநாயக்க தேரர்கள், அரசாங்க அமைச்சரவை அமைச்சர்கள், சட்டமா அதிபர், பொலிஸ்மா அதிபர் மற்றும் பாதுகாப்புப் படைகளை பிரதிநிதித்துவப்படுத்தும் சிரேஷ்ட அதிகாரிகள் குழுவொன்றும் கலந்துகொண்டனர்.
