காலி, தங்கெதர பிரதேசத்தில் ஒரு வர்த்தகரை இலக்கு வைத்து நடத்தப்பட்ட துப்பாக்கிச் சூட்டில் அந்த வர்த்தகர் உயிரிழந்துள்ளதாக பொலிஸார் உறுதிப்படுத்தியுள்ளனர். நிதி வட்டித் தொழில் மற்றும் வாகன விற்பனைத் தொழிலில் ஈடுபட்டு வந்த ஒருவர் இவ்வாறு கொல்லப்பட்டுள்ளார். இச்சம்பவம் நேற்று (12) காலை 7.30 மணியளவில் தங்கெதர டிக்மன் சந்திக்கு அருகில் இடம்பெற்றுள்ளது.
ஆரம்பகட்ட விசாரணைகளின்படி, வட்டிப் பணம் தொடர்பான தகராறு இந்தக் கொலைக்கு காரணமாக இருக்கலாம் என பொலிஸார் சந்தேகம் வெளியிட்டுள்ளனர். வேறு தனிப்பட்ட காரணங்களுக்காக ஏதேனும் ஒரு தரப்பினரால் வழங்கப்பட்ட ஒப்பந்தத்தின்படி இது திட்டமிட்டு நடத்தப்பட்டதா என்பது குறித்தும் விரிவான விசாரணைகள் நடைபெற்று வருகின்றன.இவ்வாறு கொல்லப்பட்டவர் அஹங்கம பிரதேசத்தைச் சேர்ந்த நிரந்தர வதிவாளரான 44 வயதுடைய புஞ்சி ஹேவாகே பிரசாத் என்ற வர்த்தகர் ஆவார். அவர் தனது இரண்டு பிள்ளைகளின் கல்வி நடவடிக்கைகளை இலகுபடுத்துவதற்காக சுமார் ஆறு மாதங்களுக்கு முன்னர் தங்கெதர டிக்மன் பிரதேசத்தில் ஒரு வாடகை வீட்டைப் பெற்று மனைவி மற்றும் பிள்ளைகளுடன் அங்கு குடியேறியுள்ளார். நேற்று காலை தனது காரில் இரண்டு பிள்ளைகளையும் பாடசாலையில் இறக்கிவிட்டு மீண்டும் தனது வீட்டுக்கு அருகில் வந்தபோது இந்த துப்பாக்கிச் சூடு நடத்தப்பட்டுள்ளதாக தெரிவிக்கப்பட்டுள்ளது.
பிரசாத் தனது காரில் இருந்து இறங்க முயன்றபோது, ஒரு காரில் வந்த இரண்டு நபர்களில் ஒருவர் அவரை இலக்கு வைத்து பிஸ்டல் ரக துப்பாக்கியால் தொடர்ச்சியாக சுட்டுள்ளார். துப்பாக்கிச் சூடு நடந்தபோது அவரது மனைவியும் காரில் இருந்துள்ளார், ஆனால் அவருக்கு எந்த காயமும் ஏற்படவில்லை என பொலிஸார் தெரிவித்தனர். துப்பாக்கிச் சூட்டில் பலத்த காயமடைந்த அவர் உடனடியாக அதே காரில் காலி தேசிய வைத்தியசாலையில் அனுமதிக்கப்பட்ட போதிலும், சிகிச்சை பெற்று வந்த நிலையில் உயிரிழந்துள்ளார்.
கொல்லப்பட்ட நபர் இதற்கு முன்னரும் தனது உயிருக்கு பாதுகாப்பு கோரி பொலிஸாருக்கு அறிவித்திருந்தமை தெரியவந்துள்ளது. தான் சென்று வரும் இடங்கள் குறித்து காரில் வரும் ஒரு குழுவினர் கண்காணிப்பதாக அவர் பொலிஸில் முறைப்பாடு ஒன்றையும் செய்துள்ளார். அச்சமயத்தில் பொலிஸார் அவரிடம் சந்தேகநபர்கள் குறித்து விசாரித்தபோது, தனக்கு எவர் மீதும் சந்தேகம் இல்லை என அவர் கூறியுள்ளார். அந்தத் தகவலைப் பெற்ற பின்னர், அவர் தற்காலிகமாக வசித்து வந்த வீட்டிலிருந்து வெளியேறி, மீண்டும் சில வாரங்களுக்கு முன்னர் இந்த வாடகை வீட்டிற்கே குடியேறியுள்ளமை பொலிஸ் விசாரணைகளில் தெரியவந்துள்ளது.
குற்றவாளிகள் வந்த கார் தடல்ல பிரதேசத்தில் கைவிடப்பட்ட நிலையில் பொலிஸாரால் கண்டுபிடிக்கப்பட்டுள்ளதுடன், பொலிஸ் கைரேகை நிபுணர்கள் இது குறித்து மேலதிக விசாரணைகளை மேற்கொண்டு வருகின்றனர். தென் மாகாணத்தின் பொறுப்பதிகாரியாக நியமிக்கப்பட்டுள்ள சிரேஷ்ட பிரதிப் பொலிஸ் மா அதிபர் மகேஷ் சேனாரத்னவின் பணிப்புரையின் பேரில் இந்தக் கொலை தொடர்பாக விசாரிக்க நான்கு விசேட பொலிஸ் குழுக்கள் நியமிக்கப்பட்டுள்ளன. கொலையாளிகளைக் கைது செய்ய பொலிஸ் புலனாய்வுப் பிரிவினரும் ஈடுபடுத்தப்பட்டுள்ளனர், இதுவரை எவரும் கைது செய்யப்படவில்லை.
