நாட்டின் தற்போதைய சூழ்நிலையைக் கருத்தில் கொண்டு, இந்த ஆண்டு மாகாண சபைத் தேர்தலை நடத்த முடியாது என்று மக்கள் விடுதலை முன்னணியின் (JVP) பொதுச் செயலாளர் டில்வின் சில்வா தெரிவித்துள்ளார். இது தொடர்பான சாத்தியக்கூறுகள் அடுத்த ஆண்டு மட்டுமே ஆராயப்படும் என்றும் அவர் மேலும் குறிப்பிட்டுள்ளார்.
தேசிய மக்கள் சக்தியின் (NPP) முக்கிய பங்காளியும் மக்கள் விடுதலை முன்னணிதான்.இலங்கையின் மாகாண சபை முறைமை 2017 ஆம் ஆண்டு முதல் இன்றுவரை செயலிழந்த நிலையில் உள்ளது. எவ்வாறாயினும், அதிகாரப் பரவலாக்கம், அரசியலமைப்புச் சீர்திருத்தங்கள் மற்றும் ஒத்திவைக்கப்பட்ட மாகாண சபைத் தேர்தல்களை நடத்துதல் ஆகிய விடயங்கள் தேசிய மக்கள் சக்தியின் தேர்தல் விஞ்ஞாபனத்தில் முக்கியமாக வலியுறுத்தப்பட்டுள்ளன.
இதற்கிடையில், தேர்தல் முறையை மாற்றி அறிமுகப்படுத்தப்பட்ட புதிய சட்டம் காரணமாக எழுந்துள்ள சட்டச் சிக்கல் காரணமாக மாகாண சபைத் தேர்தலை நடத்துவது தேர்தல் ஆணைக்குழுவிற்கும் கடினமான காரியமாக மாறியுள்ளது. 2017 ஆம் ஆண்டின் 17 ஆம் இலக்க மாகாண சபைத் தேர்தல் (திருத்த) சட்டத்தின் மூலம் புதிய கலப்பு விகிதாசாரப் பிரதிநிதித்துவ முறை அறிமுகப்படுத்தப்பட்டது. அதன்படி, பிரதிநிதிகளில் 50% வட்டார முறை மூலமாகவும், மீதமுள்ள 50% விகிதாசாரப் பட்டியல் மூலமாகவும் தேர்ந்தெடுக்கப்படவிருந்தனர்.
இந்த புதிய முறைமைக்குத் தேவையான எல்லை நிர்ணயப் பணிகளுக்காக நியமிக்கப்பட்ட எல்லை நிர்ணய ஆணைக்குழு தனது அறிக்கையைத் தயாரித்து 2018 ஆம் ஆண்டில் பாராளுமன்றத்தில் சமர்ப்பித்தது. எனினும், அரசியல் கட்சிகளுக்கிடையே நிலவிய கருத்து வேறுபாடுகள் காரணமாக ஒருமித்த கருத்தை எட்ட முடியாததால், அது பாராளுமன்றத்தில் விவாதிக்கப்பட்டு தோற்கடிக்கப்பட்டது.
புதிய முறைமையின் கீழ் எல்லை நிர்ணயம் செய்வது சட்டரீதியாக சவாலானது மற்றும் காலத்தை எடுத்துக்கொள்ளும் ஒரு பணி என்பதால், பழைய தேர்தல் முறைமையின் கீழாவது தேர்தலை நடத்த வேண்டும் என்று எதிர்க்கட்சிகள் வலியுறுத்துகின்றன. இதற்கிடையில், மாகாண சபைத் தேர்தலை நடத்துவதற்கு பொருத்தமான தேர்தல் முறைமை எது என்பதை ஆராய்ந்து பாராளுமன்றத்திற்கு அறிக்கை சமர்ப்பிப்பதற்காக பாராளுமன்றத் தெரிவுக்குழு ஒன்றும் நியமிக்கப்பட்டுள்ளது.